Их хотын хөгжилтэй хөл нийлүүлэн алхаж нэгэн өдрийг үдэж буй эрхэм уншигч та бүхэндээ энэ оройн мэнд хүргэе. Та бид энэ нийгмийн нэг эд, эс. Тиймээс сайн зүйлийг бусдад түгээж тэр хэрээр өөрсдөө сайныг хүртэж урмаар амьдардаг. “Нийгэмд тустай сайн мэдээ түгээх аян”-ы хүрээнд өдөр бүрийн энэ цаг мөчид өнөөдрийн сайн мэдээг тоймлон хүргэдэг “Сайн”-ыг тоймлов булангаа хүргэхэд бэлэн боллоо. Тоймоо хүлээн авна уу.
Ой тогтоолтын тамирчид АНУ руу мордлоо
АНУ-ын Сан Диего хотод энэ сарын 24-26-нд дэлхийн шилдэг 24 тамирчны хооронд 75.000 долларын шагналын сантай “Extreme Memory Tournament-2016” ой тогтоолтын халз тэмцээн болно. Тус тэмцээнд оролцох тамирчид, дасгалжуулагч багшийн хамт өнөөдөр АНУ-ыг зорилоо. Манай багийн бүрэлдэхүүнд ОУ-ын их мастер Ө.Сэнгэсамдан, Э.Пүрэвжав, Их мастер Б.Шижир-Эрдэнэ, ОУ-ын мастер З.Цэцэгзул, ОУ-ын мастер А.Анударь нар багтжээ. Тэмцээнд Герман долоо, Америк дөрөв, Англи гурав, Швед хоёр, Нидерланд, Филиппин, Хятад улсаас тус тус нэг тамирчин өрсөлдөх юм.
Явган зорчигч руу ус цацсан жолоочийг торгоно
Явган зорчигч руу санаатайгаар ус цацсан жолоочийг Замын цагдаагийн газарт мэдэгдэж, хариуцлага тооцуулах боломжтой юм. Ингэхдээ тухайн автомашины улсын дугаарыг Замын цагдаагийн газрын 93021124 болон 124 дугаарт залгаж мэдэгдэх аж. Гомдлын дагуу Замын цагдаагийн газраас шалгалт хийж санаатайгаар ус цацсан жолоочид хариуцлага тооцож, торгох арга хэмжээ авах юм байна.
Улсын нэгдүгээр төв эмнэлэг салбар амбулаторитой боллоо
Улсын нэгдүгээр төв эмнэлгийн салбар амбулатори өнөөдөр нээлтээ хийж, Монгол Улсын Ерөнхий сайд Ч.Сайханбилэг, Эрүүл мэнд, спортын сайд С.Ламбаа, тус эмнэлгийн захирал Б.Бямбадорж болон эмч, ажилтнууд оролцлоо. 90 жилийн баялаг түүх, арвин туршлагатай Улсын нэгдүгээр төв эмнэлгийн нэг жигүүр болох салбар амбулатори үүдээ нээж байна. Засгийн газраас орон нутгийн эмнэлгүүдийн хүчин чадлыг нэмэгдүүлэх зорилгоор 11 аймагт оношилгооны төв байгуулж, Улсын нэгдүгээр төв эмнэлэг, Хавдар судлалын үндэсний төв, Эх хүүхдийн эрүүл мэндийн төв, Цэргийн нэгдсэн эмнэлэгт 79 тэрбум төгрөгийн шинэ тоног төхөөрөмж суурилуулсан.
Мөн сүүлийн үеийн тоног төхөөрөмж бүхий Үндэсний оношилгооны төв болон АШУИС-ийн нэгдсэн эмнэлэг, Ховд аймаг дахь баруун бүсийн оношилгооны төвийг 300 гаруй тэрбум төгрөгийн хөрөнгө оруулалтаар барьж эхэлсэн гэдгийг тэрээр тэмдэглээд эдгээр ажлын үр дүнд монгол хүн Монголдоо оношилгоо, эмчилгээ хийлгэх үндэс бүрдэх аж.
Монголын маань цэлмэг тэнгэр ододтойгоо учирахаар догдлон алтан наран уулсын цаагуур өнгийх цаг мөчид Монгол оронд маань өнөөдөр болж өнгөрсөн зарим үйл явдлуудаас Сайн мэдээг онцлон дуулгалаа. “Нийгэмд тустай сайн мэдээ түгээх аян”-ы санаачлагч “Эрдэнэт үйлдвэр” ХХК, зохион байгуулагч “Монголын сэтгүүлчдийн нэгдсэн эвлэл”, түгээн дэлгэрүүлэгч chuhal.mn сайт.
Босоо заяат Монгол түмний минь заяа хийморь нь үргэлж өөдөө байж, дуу шиг уянгатай, сүү шиг өнгөтэй сайн мэдээ бүхэн тархан цуурайтах болтугай. Сайн үйлс бүхэн өнгөжин дэлгэрч, цагаан сүүний цацал адил өөдлөн дэвжих нь лавтай
www.Chuhal.mn
