Розз Кемп гэх хөтлөгч залуу дэлхий даяар аялаж, нуугдмал, сонирхол татахуйц олон сэдвийг хөндөн телевизийн цуврэл нэвтрүүлгийг бэлтгэн хүргэдэг билээ. Тэрээр 2016 оны дөрөвдүгээр сард Монгол улсад зочилж, үндсэрхэг үзэлтэн болох Нео-нацист бүлэглэлийн талаар эрэн сурвалжилсан нэвтрүүлгийг хүргэжээ. Тус нэвтрүүлэг нь интернет болон SKY1 телевизээр үзэгчдэд хүрсан бөгөөд гарсан даруйдаа шуугиан тариад байгаа билээ.
Тус нэвтрүүлгийн эхний хэсэгт хууль бусаар амьдардаг Хятад иргэд монгол залуусыг зодож танхайрдаг талаар гарчээ. Үүнтэй нео-нацист бүлэглэл хэрхэн тэмцдэг талаар гаргасан. Мөн Вьетнам иргэнтэй гэр бүл болсон монгол эмэгтэйн нэр, царайг нууцлан оролцуулжээ. Хөтлөгч Розз Кемп Монголд Вьетнам авто засвар ажиллуулахад ямар байгааг асуухад тэрээр өөрийн бизнестээ санаа зовож байгаагаа илэрхийлээд неонацист бүлэглэлүүд гадны иргэдийг хэт их дээрэлхэж байгаа талаар ярилаа. Мөн бүлэглэлүүд түүний Вьетнам нөхрийг удаа дараа зодож, ахынхан хавиргыг хугалсан тухай ярьсан юм.
Тус нэвтрүүлэгт Монгол улсад санхүүгийн хямрал нүүрлэж, гадны орнуудад эрдэс баялагаа бага үнээр борлуулж байгаа талаар мөн тусгасан байна. Налайхын уурхайн ажиллах үйл явцыг үзэгчдэд танилцуулж, монголд ажил олдохгүй байгаа талаар хуучиллаа. Уурхайн гүн рүү нэвтэрч, доошлох тусам агааргүй болж,аюулгүй байдалд ноцтой хохирол учруулж байна гэсэн ч амьдрахын эрхэнд хийж байгаагаа ажилчид илэрхийллээ.
Нэвтрүүлгийн төгсгөлд малчин ахуйтай танилцаж, малынхаа үр шимийг хүртэж чадалгүй малаа алдсан малчдын төлөөлөлтэй танилцаж, саналыг нь сонссон юм. Малчид байгаль дэлхийтэй буруу харьцсанаас болж 5 жил тутамд зуд, ган гачиг болж буй талаар ярьсан юм.
Хотод дунджаар жилдээ 40000 гаруй иргэд сууршихаар ирдэг талаар ч мөн гаргасан байна. Энэхүү телевизийн бүтээл нь тэр чигтээ нео-нацист бүлэглэлийн тухай, монголын нийгэм аж амьдралын талаар өгүүлсэн бүтээл боллоо.
.jpg?1737345727832)
