УИХ-аас Хүүхэд харах үйлчилгээний тухай хуулийн хэрэгжих хугацааг 2021 он болгон хойшлуулах шийдвэрийг гаргаад байгаа. Санхүүжилтийг нь энэ оны 12 дугаар сарын 31-ээр зогсоохоор болсон нь эцэг эхчүүдээс маш их шүүмжлэл дагуулах болсон.
Тэгвэл уг асуудлаар өнөөдөр 6353 хүүхдийн эцэг эхийн төлөөлөл, Хүүхэд харах үйлчилгээ эрхлэгчид хүүхэд харах үйлчилгээг үргэлжлүүлэхийг Монгол Улсын Ерөнхийлөгч, УИХ-ын гишүүдэд шаардлага хүргүүлэх талаар "Монгол ньюс" мэдээллийн төвд хэвлэлийн хурал хийхээр болжээ.
Дашрамд дуулгахад, хүүхэд харах үйлчилгээний хуулийн дагуу 150 сургагч багш, 1800 гаруй хүүхэд харагчийг таван чадамжийн сургалтад хамруулж, сертификат олгосон байна.
Мөн улсын хэмжээнд 10.8 тэрбум төгрөгийг хүүхэд харах үйлчилгээний тухай хуулийг хэрэгжүүлэхэд зориулж гаргасан. Төслийн хүрээнд улсын хэмжээнд 10328 хүүхэд үйлчилгээнд хамрагдаж байсныг албаныхан хэлж байв.Өөрөөр хэлбэл хүүхэд харах үйлчилгээг зогсоосноор 10328 хүүхэд цэцэрлэггүй үлдэж байгаа юм.
