Сайд С.Эрдэнэ сайд "Цензургүй яриа" нэвтрүүлэгт оролцох үеэрээ Баабар ажилласан жилээ нэмэгдүүлж улсын мөнгийг шамшигдуулсан тухай ярьсан юм. Тэгвэл үүнд Баабар дараах тайлбарыг хийжээ.
Ингэхдээ Баабар: "Би хуурамч бичиг баримт бүрдүүлээгүй. Тэрийг өөрсдөө хийсэн байхгүй юу. Эхлээд занганд оруулаад дараа нь хэрэгт оруулах чинь шоронгийн арга.
Хулгай хийж үү үгүй юу гэдэг чинь гол асуудал болохоос миний бүх амьдралыг сөхвөл сонин сонин юм гарч ирэх байх л даа. Энд тэнд тийм хүүхэнтэй явалддаг, хүүхэд хийсэн энэ тэр гэсэн асуудал гарахыг би яаж мэдэх вэ дээ. Би 1954-10-26 төрсөн. Өнгөрсөн жилийн сүүлээр тэтгэвэрт гарсан. Нам, хувьсгал гээд бүртгүүлэлгүй ажиллаж байсан үед хэсэг зай гарчихсан юм. Тэгээд хүмүүс ирж шалгаад онгорхой зайныхаа мөнгийг төлөөд тэтгэвэрт гар гэсэн. Тэгээд тэтгэвэрт гарахын тулд 10 гаруй сая төгрөг тушаасан. Дараа нь тэтгэвэр рүү шалгалт орлоо гээд тэтгэврийг маань хаачихсан.
"Эрдэнэс холдин"г гэдэг компанийг би ерөөсөө мэдэхгүй. Дүүргийн тэтгэврийн газрын дарга нь Эрдэнийн бэр юм байна. Тэгээд өөрсдөө "Эрдэнэс холдинг" руу ярьж намайг занганд хийсэн байгаа юм. Дараагаар нь тэтгэвэр хааж шалгалт оруулаад нөгөөдхөө гэмт хэрэг болгож илрүүлж байгаа байдал.
Би 200 мянган төгрөг илүү авах гээд хуурамч бичиг баримт бүрдүүлсэн юм шиг байгаа юм. Би “Миний өгсөн 10 сая төгрөгийг буцаагаад өг. Би тэтгэвэр авахгүй” гэж хэлсэн" хэмээжээ.
Мөн С.Эрдэнэ сайдын талаар "Эрүүгийн хэрэгтэн. Нийгмийн газрын дарга байхдаа л шоронд орж байхад нь АН ялсан үедээ эргүүлээд гаргаад авч байсан. НД-ын нилээн хэдэн тэрбум төгрөгөөс одоо 200 сая төгрөг л байна. Бусдыг нь энд тэнд байрлуулаад хүүг нь хусаал явж байна. Хэдэн мянган нас барчихсан хүний тэтгэврийг аваад л явж байна. Хөгшин хүмүүсийг худлаа амруулж байгаа нэрээр улсаас мөнгө авч байна. Бид нар яагаад ийм хүмүүсээс салж болдоггүй юм бэ.
Энэ улсын менежментийг хийж байгаа ихэнх хүмүүс чинь хулгайч, луйварчин, дээрэмчин, эрүүгийнхэн эсвэл мэдрэлийн өвчтэй хүмүүс болчихоод байна.
Улс орноо бодооч ээ. Тоноод дууслаа. Бид нар үр хүүхэддээ ямар газар үлдээх юм бэ. Энэ улс чинь онхолдлоо, сүйрлээ. Хараад суугаад байх юм уу. Нөгөө цагдаа, АТГ, шүүх, прокурор хаана байна. Цөмөөрөө айдаг байхгүй юу" хэмээн хатуухан үгсийг шидсэн байна" гэсэн байна.
