Аврагчид шуурганд төөрсөн иргэнийг эсэн мэнд олжээ

Нийслэлийн Багануур дүүргийн 2 дугаар хороо, Багануур хөшөөний баруун хойд талд мал тууж явсан иргэн шуурганд төөрсөн байна.

Уг дуудлагыг өчигдөр 20:06 цагт хүлээн авч дүүргийн Онцгой байдлын хэлтсийн Гал түймэр унтраах, аврах 64 дүгээр ангийн бэлтгэл ээлжийн 4 албан хаагч 1 хэрэгсэлтэйгээр ажиллаж, иргэн 36 настай, эмэгтэй 3-г эсэн мэнд олж, 1300 бог малыг тус дүүргийн “Хэвтээ ухаа” гэдэг газар хүргэн аюулгүй болгосон байна.

Үүнээс гадна ус, цас, шаварт саатсан таван дуудлага ирсэн байна. Тухайлбал Нийслэлийн Сонгинохайрхан дүүргийн 21 дүгээр хороо, Төмөр замын 61 дүгээр гармаас Хүй долоон худаг явах замд иргэн У-н “Ниссан патрол” загварын автомашин цасанд суусан, Налайх дүүргийн 3 дугаар хороо, Их зэвсэг гэдэг газар иргэн Б-н “Верна” загварын автомашин цасанд суусан байсныг дүүргийн онцгой байдлын хэлтсийн алба хаагчид татан гаргаж аюулгүй болгожээ.    

Мөн голын мөс цөмөрч, хоёр автомашин суусан осол гарчээ. Тодруулбал Баянзүрх дүүргийн 9 дүгээр хороо,  Шархадны автобусны эцсийн буудлын урд Улиастайн голд иргэн О-н “Тоёота Спринтер” загварын автомашин, Төв аймгийн Баяндэлгэр сумын Галуут багийн Бэрхийн булан гэдэг газар иргэн М-н “Дейвүү Риззо” загварын ачааны автомашин Хэрлэн голын мөсөнд цөмөрсөн байсныг онцгой байдлын хэлтсийн аврагчид татан гаргажээ.