УИХ-ын гишүүн асан Ж.Сүхбаатар сонгуулийн өмнө МАН-аас МАХН-руу орсон. Тэр бүү хэл МАХН-ын Ерөнхий нарийн бичгийн дарга болж дэвшсэн юм. Ж.Сүхбаатар УИХ-ын 2016 оны сонгуульд Дархан-Уул аймагт нэр дэвшсэн ч ялагдал хүлээсэн. Харин экс нам нь үнэмлэхүй олонхи болоход сошиалынхан "Та МАН-даа байсан бол..." хэмээн халагласан удаатай. Тэгвэл тэрбээр МАХН-ын генсекээс чөлөөлөгдөх өргөдлөө өгөөд хоёр сар болж байгаагаа өнөөдөр цахим хуудастаа мэдэгджээ. Үүнийгээ хариуцлага хүлээж буйтайгаа холбон тайлбарласан байна. Гэхдээ бас нэг сонирхол татах зүйл жиргэсэн нь "Нам нь, гишүүд нь муу биш. Удирдагч маань арга барилын хувьд алдаа их гаргасан" гэж бичсэн тухай байв. Эндээс үзвэл тэрбээр Н.Энхбаяртай зөрчилдсөн болж таарах нь. Мөн Н.Энхбаяр түүнд таалагдаагүй бололтой. Хэрэв тийм бол Н.Энхбаяр гэдэг хүн намынхаа генсекүүдийг тайван байлгадаггүй бололтой. МАХН-ын генсек асан Г.Шийлэгдамба авлигын хэргээр саатуулагдаад гарч ирснийхээ дараа "Намын дарга намайг хандив мөнгө ол гэж байнга дарамталдаг" гэсэн утгатай зүйл ярьсан ч Н.Энхбаяр үгүйсгэсэн. Гишүүн асан Л.Цог ч мөн адил "Н.Энхбаяр намайг сая ам.доллар өг гэсэн" гэж хэлсэн биш шүүхдэлцэхдээ тулж байсан ч хоорондоо ойлголцсон уу яасан таг чиг болжээ. Харин Ж.Сүхбаатар өнөөдөр намд хүчин зүтгэхгүйгээ зарлалаа. Тэрбээр энэ үгээ "Залхлаа. Ном үзэж, биеэ тордоно" хэмээн тайлбарласан юм.
