Сүүлийн үед манай нийгэмд кинон дээрээс хардаг байсан олон жигшүүрт хэрэг гарах болсон. Сүүлд гэхэд өнгөрсөн амралтын өдөр 5 шард байрлалтай Худалдаа хөгжлийн банкнаас ах, дүү хоё 380 сая төгрөг дээрэмдсэн хэрэг гарсан. Улмаар Цагдаагийнхан түргэн шуурхай ажиллаж 24 цагийн дотор гэмт этгээдүүдийг олж банкыг хохиролгүй болгосон. Шалгалтын явцад 380 сая төгрөг бус харин 424 сая төгрөг дээрэмдсэн болох нь тогтоогдсон юм.
Ах, дүү хоёр “Land cruiser-105” маркийн машинаа ломбарданд тавьжээ
Баг зүүж банк дээрэмдсэн хоёр залуус хувирааа хөдөлмөр эрхэлдэг 1985,1992 оны төрсөн ах дүүс байсан аж. Тэд эхний мэдүүлэгтээ “Хүнсний дэлгүүр ажиллуулдаг. Банкнаас зээл авсан.Зээлээ төлж чадахгүйд тулж машинаа ломбарданд тавьсан. Улмаар ломбарданд тавьсан машинаа алдах дээрээ тулдсан учир ийм үйлдэл хийсэн” гэж байжээ. Гэвч ах, дүү хоёрын ажиллуулдаг дэлгүүр хэвийн ажиллаж байгаа төдийгүй тэд өрөнд ороогүй бололтой. Учир нь тэд саяхан манайдаа л тансаг зэрэглэлд хамаарагддаг нэгэн хотхонд гурван өрөө байр авсан аж . Түүнчлэн ломбарданд тавьсан машин нь “Land cruiser-105” маркийн машин байсан аж. Ажилтай орлоготой ах, дүү хоёр хууль бус мөрийтэй тоглож их хэмжээний өрөнд орсон учир болчимгүй үйлдэл хийж амьдралаа хараар будсан бололтой.
Банк дээрэмдэхээр эртнээс төлөвлөжээ
Тэд банкнаас дээрэмдсэн их хэмжээний мөнгөө машиндаа нууж улмаар хоёр тийшээ салан саунд хоножээ. Харин маргааш нь нуусан мөнгөө шалгаж байгаад цагдаа нарт баригдсан байна. Ах, дүү хоёр уг дээрэмийг эртнээс төлөвлөсөн бололтой. Учир нь тэд “pruis-20” худалдаж авсан байна. Ингэхдээ мөнгөө өгсөн боловч өөрсдийн нэр дээр шилжүүлээгүй аж. Түүнчлэн дээрмийн үеэр хэрэглэсэн буугаа мөн л өөрсдийн нэр дээр шилжүүлээгүй худалдаж авчээ. Тэд өдгөө Эрүүгийн хуулийн 147.3-аар шалгагдаж байгаа аж. 147.3-т зааснаар “Онц аюултай гэмт хэрэгтэн, зохион байгуулалттай бүлэг, гэмт бүлэглэл, урьд нь шийтгүүлсэн этгээд үйлдсэн энэ хэргийн улмаас онц их хэмжээний хохирол, бусдын бие махбодид хүнд гэмтэл учирсан бол эд хөрөнгийг хурааж арваас дээш хорин жил хүртэл хугацаагаар хорих ял шийтгэнэ ” гэж заасан байдаг аж.