Зөвшөөрөлгүй ТҮЦ-үүдийг албадан нүүлгэж байгаатай холбогдуулан ТҮЦ эрхлэгч иргэдийн төлөөлөл өнөөдөр мэдээлэл хийлээ. ТҮЦ буулгах ажлыг Нийслэлийн өмчийн харилцааны газраас зохион байгуулж байгаа билээ. Тэд хэлэхдээ “Бид төрөөс ямар ч тэтгэвэр, тэтгэмж авахгүйгээр өөрсдийнхөө амжиргааг залгуулж байна. Нэг хүний 7-8 хүн байдаг. Тиймээс бид энэ удаа хэвлэлийн хурал зарлах боллоо. Бид нийслэлээс тавьсан бүх шаардлагыг биелүүлээд, “Эрүүл, жаргалтай Улаанбаатар” уриан дор бүх зөрчил дутагдлаа засъя. Бидэнтэй хамтарч ажиллаач, бид юу хийх ёстой вэ? гэдэг асуудлыг шат шатны байгууллагуудад бүгдэд нь тавьсан. Гэвч өчигдрөөс эхлээд бидний заримынх нь тогийг таслаад эхэллээ. Ард иргэдийг хөдөлмөрлөх гэхэд яагаад юм хийлгэхгүй байгаа юм бэ гэсэн энэ олон асуултдаа бид удирдлагуудаас хариу авмаар байна. Төрийн албаны уялдаа холбоогүй шийдвэрээр олон хүн хохирч байна. 2014 онд баталсан тогтоол, тухайн үеийн удирдлагуудын заавраар шинэчлэсэн загварын ТҮЦ-үүдийг өр зээл тавин худалдаж авсан. Гэтэл өнөөдөр өр зээлээ төлж дуусаагүй байхад дахин үйл ажиллагааг зогсоох шийдвэр гарлаа. Бидний хохирлыг буруу шийдвэр гаргасан тухайн үеийн удирдлагууд хариуцах уу, хохирлыг хэн барагдуулах вэ. Иймд Нийслэлийн Засаг дарга, Нийслэлийн өмчийн харилцааны газар бусад холбогодох байгууллагууд энэхүү асуудалд анхаарал хандуулаасай гэж хүсэж байна” гэв.
Мөн “Шаардлагад, зөвшөөрөлтэй гэгдэх ТҮЦ-үүдэд ашиг сонирхлын зөрчил бий эсэхийг тогтоох буюу зөвшөөрлийг ямар журмаар олгож байгааг шалгах, шинээр ТҮЦ эрхлэх зөвшөөрөл авч байгаа иргэдийн материалыг зөвхөн ТҮЦ эрхлэгчдийн холбоогоор дамжуулах, олон жил ТҮЦ эрхэлж байгаа иргэдэд зөвшөөрлийг нь олгох, олон ТҮЦ-тэй иргэдийн зарим зөвшөөрлийг цуцлах, автобусны буудал тус бүр дээр нийслэлийн өнгө төрхөнд тохирохуйц хоёр ТҮЦ байршуулах зэрэг шаардлагуудыг тавьж байгаа юм байна. Нэг ТҮЦ эрхлэгчийн цаана нэг өрх айл, олон ажлын байр байдаг учраас энэ асуудлыг шийдвэрлэхэд ТҮЦ эрхэлж байгаа иргэдийн шаардлага, саналыг хүндэтгээч гэж” холбогдох албаныханд санууллаа.
