УИХ-ын чуулганы хуралдаанаар Гэр бүлийн хүчирхийлэлтэй тэмцэх тухай хуулийн шинэчилсэн найруулгын анхны хэлэлцүүлгийг хийх үеэр гишүүд асуулга асууж, үг хэллээ.
Энэ үеэр УИХ-ын гишүүн А.Сүхбат “Би анхнаасаа энэ хуулийг дэмжээгүй. 2005 оны нэгдүгээр сарын 1-нээс хэрэгжиж эхэлсэн Гэр бүлийн хүчирхийлэлтэй тэмцэх тухай хууль байгаа. Энэ хууль гарснаар үр дүн гарсан. Гэтэл 2008 онд өргөн баригдаад, 2012 онд хэлэлцсэн энэ хууль цэг, таслалтай нь Өрнөдийн хуулийг авчраад тавьчихсан. Тэгэхээр энэ чинь дорнын ёс заншилтай таарахгүй байгаа юм. Монгол ёс заншилтай таарахгүй байна. Сөрөг үр дагавар ч гарч магадгүй. Хайртай хүүдээ хатуу үг хэлж болохгүй цаг юм уу, хайртай морио хазаар, амгаатай нь усалж болохгүй гээд байгаа юм уу. Энэ хууль гараад хэдэн хүн эргэж харах вэ, хууль гэж гууль гараад байна. Хуулийг яаж батлаад байгаа юм бэ. Хэн нэгэн нөхөр гаднаас санхүүжилт авчихдаг. Тэгээд сошиал ертөнцөөр энийг явуулахгүй бол болохгшүй гэдэг мессежийг өгч байна. Гэр бүлийн хүчирхийлэлтэй тэмцэх тухай хуулийн төслийн шинэчилсэн найруулгыг энэ хэвээр нь батлахгүй бол... гэдэг заналхийлэл надад ирсэн. Бүх гишүүнд ирж байна. Надад энэ хуулийг хэвээр нь батлахгүй бол 2020 оны сонголтоороо таныг гаргахггүй гэдэг дарамт ирсэн” гэлээ.
Харин УИХ-ын гишүүн М.Оюунчимэг бидэнд "Энэ хуулийг батлахдаа хүний эрхийг бодолцоорой гэсэн мессеж ирж байгаа" гэсэн хариулт өглөө.
Т.Энхэлээ
