Монголоос олдсон бас нэгэн тиранозавр үлэг гүрвэлийн гавал 2007 онд Америкийн дуудлага худалдаанд орж, 276 мянган америк доллараар зарагдаад байв. Тэгвэл АНУ-ын Манхэттэн дүүргийн эрх баригчид энэхүү араг ясыг Монгол руу буцаан илгээхээр болжээ. 67 сая жилийн настай энэхүү гавал яс нь 2012 оноос хойш Монгол руу буцааж буй 10 гаруй араг ясны нэг болж байгаа юм.
АНУ-ын Манхэттэн дүүргийн Цагаачлал болон Гаалийн асуудал хариуцсан газрын үйл ажиллагааны ахлах Глен Сорж хэлэхдээ, “Араг яс зэргийн Соёлын өв нь Монголчуудад хамаарна. Эдгээр үнэлж баршгүй соёлын өв нь хувь хүмүүс болон сонирхогчдод зарж байдаг сувенирууд биш” хэмээжээ.
Прокурорууд, Монголын говь цөлөөс хууль бусаар авчирсан энэхүү араг ясанд “чулуужсан үлдэгдэл” хэмээн буруу шошго нааж 2006 оны 6 дугаар сард АНУ-руу хууль бусаар хил нэвтрүүлсэн хэмээн хэлсэн байна. Тэдний хэлснээр, энэхүү араг ясыг Японоос Флорида мужийн Гэинсвиль хотод авчирчээ. Үүний дараа 2007 оны 3 дугаар сарын 25-нд Манхэттэнд дуудлага худалдаанд оруулж, 276 мянган америк доллараар худалдсан байна.