Ардчилсан намын даргын сунгаанд оролцож буй таван нэр дэвшигчийн хэн нь хэн болох талаар бүх хэвлэл, мэдээллийн хэрэгслүүд мэдээлж буй. Харин хэзээ үргэлж олны анхаарлыг татдаг гэр бүлийнх нь талаарх мэдээллийг Чухал.мн сайт хүргэж байна. Ингээд Ардчилсан намын даргад нэр дэвшигчдийн гэр бүлтэй танилцъя.
Н.Алтанхуяг ба хэнз охин
Н.Алтанхуягийн чимэг болсон гэргийг Э.Сэлэнгэ гэдэг. Хоёр дахь амьдрал зохиосон гэж хэл аманд жаахан өртөмтгий ч Н.Алтанхуягийнх сайхан айл. Э.Сэлэнгийн хувьд нэгэн цагт Н.Алтанхуягийн нарийн бичгээр ажиллаж явсан түүхтэй. Харин түүнээс хойш нарийн бичиг нь биш гэргий нь болж өнөөдрийг хүртэл амьдралыг нь түшилцэж ирсэн юм. Ерөнхий сайд асан Н.Алтанхуяг энэ жил 58 настай бөгөөд өнгөрсөн жил хэнз үрийн зулай үнэрлэж бяцхан охиноо өлгийдөн авсан юм. Найм дахь хүүхдээ хүлээн авсан Н.Алтанхуяг охиндоо Оюулаа гэх нэрийг хайрласан гэдэг. 2012 оны сонгуульд “Олуулаа” уриатайгаар ялалт байгуулсан тэрбээр энэ жил ч мөн ялагдлыг бэлэгдэж охиндоо Оюулаа нэрийг өгсөн гэх шум бий. Олон насаар дүү залуу эхнэр нь түүнд таван хүүхэд төрүүлж өгсөн юм. Анхны эхнэртэйгээ оюутны байрнаас амьдралаа эхлүүлсэн ч тэд гурван хүүхэдтэй болоод амьдралаа тусгаарласан байдаг. Н.Алтанхуяг хэдхэн жилийн өмнө том хүүтэйгээ хамтран гэрэл зургийн үзэсгэлэн гаргаж байсан. Түүний том хүүхдүүд нас биенд хүрч тусдаа амьдрал зохиосон гэдэг.
Зургаан хүүхэд, зургаан ач зээтэй С.Эрдэнэ
С.Эрдэнэ цөөн хүүхэдтэй байхын зовлонг мэддэг багаасаа өнөр өтгөн гэр бүлтэй болохыг мөрөөдөж иржээ. Түүний эл мөрөөдөл биелэж дөнгөж 20 шүргэж байхдаа анхны хүүхдээ өлгийдсөн гэдэг. Өдгөө зургаан хүүхдийн аав болсон төдийгүй зургаан ач, зээгээ тойруулсан өнөр өтгөн гэр бүлийн тэргүүн болжээ. Түүний гэргий Нинжбадгар эдийн засагч мэргэжилтэй. Эрхэм гишүүн гэргийнхээ талаар “Бурхан надад сайхан хань заяасан” хэмээн ярьдаг.
Ж.Батзандангийн Унгараас эхлүүлсэн амьдрал
УИХ-ын гишүүн Ж.Батзандан Унгарт 10 жил ажиллаж, амьдарсан хүн. Тэнд байхдаа эхнэртэйгээ танилцаж анхны хүүхдээ Унгарт төрүүлсэн байна. Тухайн үед Ж.Батзандан хуулийн ангид сурч байсан бол гэргий Дэлгэрмаа нь анагаахад сурч байжээ. Оюутны стипендээр л амьдралаа эхлүүлсэн тэд одоо дөрвөн хүүхдийн эцэг, эх юм. Дэлгэрмаа сургуулиа төгсөөд Унгарын Бошуд мужийн нэгдсэн эмнэлэгт сэхээний эмчээр дараа нь АНУ-д эмчийн туслахаар ажиллаж байгаад нөхрөө дагаж Монголд ирсэн гэдэг. Ж.Батзандан эх орондоо ирэнгүүтээ иргэний хөдөлгөөн байгуулж, гудамжны тэмцэгчээс улс төрийн карьераа эхлүүлэхэд эхнэр нь ар, гэрийн бат түшиг болж байсан гэдэг. Үүний үр дүнд Ж.Батзандан өнөөдөр УИХ-ын гишүүн болж Ардчилсан намын даргад хүртэл нэр дэвшээд явж байна. Нэг хүүхэд нь Ж.Батзанданг иргэний хөдөлгөөний тэмцэгчийн ажлаа идэвхтэй хийж, Төрийн ордны өмнө поошиг нүдэж, улаан лооль шидэж байх үеэр төрсөн гэх юм билээ. УИХ дахь популист гишүүн гэгддэг.
БСШУ-ны сайд асан Л.Гантөмөрийн анхны хайр амьдрал болсон нь
Зөвхөн өөрийнхөөрөө амьдрахыг эрмэлздэг Л.Гантөмөр гишүүн анхны хайртайгаа гэр бүл болжээ. Түүний эхнэрийг А.Туул гэдэг. Эдийн засагч мэргэжилтэй энэ бүсгүй Монгол банкинд ажиллаж байсан юм. Сайд асан Л.Гантөмөрийн хувьд зургадугаар ангид байхдаа зэргэлдээ сургуулийнхаа охинд сэтгэл алдарч найз нөхдөөрөө захиа зөөлгөн байж хайраа илчилсэн гэдэг. Ингээд 1996 онд гэр бүл болон ханилжээ. "Би анхны хайртайгаа амьдрал зохиосондоо баярлаж явдаг. Анхны хайр бүтэлгүйтдэг гэдэг худлаа" хэмээн тэрбээр дурсан ярьсан байдаг. Тэднийх өдгөө гурван хүүхэдтэй. Хоёр охин, нэг хүүтэй. Түүний хувьд улстөрч хүнд ажлыг нь ойлгодог, сайн эхнэр байх ёстой гэсэн алтан зарчимтай. Элдэв хэл аманд өртдөггүй, энгийн сэхээтэн гэр бүл Л.Гантөмөрийнхийг дүгнэж болно.
Д.Эрдэнэбат эхнэртэйгээ 36 жил хамт амьдарчээ
Д.Эрдэнэбатын хувьд 1979 онд оюутан байхдаа гэргийтэйгээ танилцсан гэдэг. 36 жилийн хамтын амьдралыг туулж ирэхдээ тэд хоёр охинтой болжээ. Одоо өвөө, эмээ болцгоосон тэд ажил, амьдралын түшиг тулгуурууд болон амьдарч байна. Д.Эрдэнэбат гэр бүлийнхээ талаар “Хэзээ ч хэн ч асуусан би өөрийгөө сайн аав гэж хэлнэ. Надад миний хүүхдүүд толгой өөд татахгүй ном уншсан, өндөр боловсролтой байна уу огт хамаагүй. Би тэрийг ерөөсөө нэгдүгээр хэмжүүр гэж үздэггүй. Миний хүүхдүүд хэр зэрэг хүнлэг хүн байна вэ гэдэг л чухал. Би хүүхдүүддээ зүгээр хүн шиг л амьдар гэж хэлдэг” гэж ярьж байсан удаатай.
Т.Хулан
