Төв замаас бусад замууд дээр үүсдэг түгжрэлийг голдуу орон сууцны хороолол дунд, аж ахуйн нэгж, байгууллагуудын орчимд буюу зориулалтын зогсоолгүй газарт жолооч нар машинаа тавьснаар үүсдэг байна. Хэн нэгэн тоомжиргүй, соёлгүй жолоочийн буруутай үйлдлээс болж осол аваар гарах, алтан цагаа үрж ажлаа алдагдуулах зэрэг сөрөг үр дагаврууд үүсдэг билээ.
Тэгвэл энэхүү асуудлыг шийдэх үүднээс Авто тээврийн үндэсний төвийн 1900-1234 гэсэн лавлах утас руу залгаж зохиомол түгжрэлээс гарах боломжтой болжээ. Хөдөлгөөнд оролцож буй түгжрэл үүсгэсэн тээврийн хэрэгсэл хүнгүй, жолоочтой холбоо барих утасны дугаар тодорхойгүй үед иргэд дээрх дугаар луу залгаж, асуудлыг шийдэх боломжтой аж.
Дээрх утас руу залгаснаар операторууд тухайн автомашиныг улсын дугаараар нь шүүж, эзнийг нь тогтоогоод хэрэглэгчтэй шууд холбож өгөх үйлчилгээ үзүүлдэг байна. Уг үйлчилгээг иргэд ажлын өдрүүдэд 07:00-22:00, бямба, ням гарагт 08:00-20:00 хүртэл авах боломжтой. Авто тээврийн үндэсний төвийн мэдээллээр тус төвд өдөрт дунджаар 80-120 иргэн ханддаг бөгөөд баяр ёслолын өдрүүдээр энэ тоо 2-3 дахин нэмэгддэг байна.
