АН-ын ахмад гишүүн О.Цоодол, Д.Батсайхан, Н.Төмөрбаатар нар мэдээлэл хийлээ. Тэд намаа удирдлага бүтэц зохион байгуулалтын хувьд шинэчлэгдэхээс гадна шинэ байртай болох ёстой гэж үзэж байгаа ажээ. Ерөнхий сайд асан Н.Алтанхуяг намын даргаар ажиллаж байхдаа намаа шинэ байртай болгоно гэж байсан боловч чадаагүй учраас одоо шинээр сонгогдох намын дарга байртай болгох зорилт тавих ёстой гэдгийг онцолж байлаа. Тэгэхгүй бол одоо үйл ажиллагаа явуулж байгаа байр нь Шинэ дэвшилт холбооных бөгөөд түрээсийн төлбөр төлдөг юм байна. АН-ын ахмад гишүүн О.Цоодол энэ талаар хэлэхдээ “Н.Алтанхуяг намын дарга байхдаа намаа байртай болгож чадаагүй нь харамсалтай. Соёлын төв өргөөний хажууд байсан байрыг буулгаад 2012 оны сонгуулиас өмнө шинэ байр барихаар төлөвлөж байсан юм. Гэтэл үндэсний хэмжээний нам байж одоо болтол байргүй байгаад харамсч байна. Намын даргын сонгуультай холбоотойгоор сүүлийн үед намын байрны газраа зарсан долоон тэрбум төгрөгийг идсэн гэх мэдээлэл гарах боллоо. Бидний олж авсан мэдээллээр долоон тэрбум төгрөгнөөс 2.4 тэрбум л намд ирсэн юм байна” гэв.
