Бондын өр төлбөрт санаа зовсон иргэд мөнгө төгрөг, алт мөнгө, агт морь Засгийн газартаа хандив болгож өгөх үйл ажиллагаа өнгөрсөн долоо хоногоос эхэлсэн билээ. Энэхүү хандивын үйл ажиллагааг Гавьяат эдийн засагч Б.Осоргарав санаачилж, “Эх орноо эдийн засгийн хүндрэлээс гаргахын төлөө” уриалга гаргаж, хандивын аяныг эхлүүлсэн. Түүний энэхүү санаачлагыг УИХ-ын гишүүн Дэлгэрсайхан дэмжихээ илэрхийлж улсдаа 100 сая төгрөг хандивлахаа мэдэгдээд байгаа. Олгиархууын тавьсан өр төлбөрийг ард түмэн төлөхгүй хэмээн эсэргүүцэл илэрхийлж байсан ард иргэд ийнхүү улс орон ирээдүй үр хүүхдийнхээ төлөө хандивын аян эхлүүлээд байна. Түүний уриалга, санаачилгыг аж ахуйн нэгж, иргэд идэвхтэй дэмжиж хандив, тусламж үзүүлэхээ илэрхийлээд байгаа ч хаана хэнд хандаж өгөх нь тодорхой бус байсан юм. Тэгвэл Монголын засгийн газар түүхэндээ анх удаа хандивын данс нээлээ.
Ерөнхий сайд Ж.Эрдэнэбат албан ёсны хандивын данс нээхийг Сангийн сайд Б.Чойжилсүрэнд үүрэг болгосоны дагуу хандивын данс нээгдлээ.Энэ дагуу Сангийн яамнаас хандив, тусламжийн орлогыг төвлөрүүлэх “Хандив”-ын төгрөгийн болон валютын дансуудыг Төрийн сан, Төрийнбанк болон Монголбанканд нээснийг мэдээллээ. Үүнд:
Төрийн сан 100900080800 Хандив MNT,
Монгол банк 3332444 Хандив USD,
Төрийн банк 106030080800 Хандив MNT, USD
Дээрх дансуудад цугларсан хандив болон түүний зарцуулалтын талаарх мэдээллийг Сангийн яамнаас олон нийтэд ил тод, тогтмол мэдээлэх юм байна.
Өнгөрсөн долоо хоногт Ерөнхий сайд Ж.Эрдэнэбат "Засгийн газар ард түмнээсээ хандив авахгүйгээр бондын өрөө ч төлнө, эдийн засгийн хямралаа ч давна, тийм бололцоо бүрэн байгаа" гэж байр сууриа илэрхийлж байсан ч эцэстээ ядарсан ард иргэдээсээ хандив туслаж авахаар болсон байна.