Сүүлийн үед хүмүүс байгалийн үзэсгэлэнт газруудаар аялах, ууланд авиралт хийх явдал ихэсч, улмаар тухайн агшныг харуулсан фото зургаа өөрөө дарж хувийн хуудсандаа байршуулах сонирхолтой болсон. Энэ нь зарим тохиолдолд өөрийн болон бусдын амь насыг эрсдэлтэй нөхцөл, байдалд хүргэсээр байна.
Тухайлбал, Сэлэнгэ аймгийн Шаамар сумын Дулаанхаан тосгоноос 2 км зайд байрлах Дулаанхаан уулын урд энгэрт Улаанбаатар хотын харьяат иргэн,30 настай, эмэгтэй энэ сарын 10-ны өдөр уул руу зураг авна гэж ганцаараа яваад халтирч унан, толгойдоо гэмтэл авсны улмаас тусламж дуудаж чадалгүй улмаар осгож амь насаа алдсан хэрэг гарсан. Иймд иргэд өөрсдийн аюулгүй байдлыг хангаж явах, өөрийн болон бусдын амь насанд аюултай нөхцөл байдал бий болгохгүй байх, анхаарал болгоомжтой байхыг Сэлэнгэ аймгийн прокурорын газраас анхааруулжээ.
