Нийслэлийн Хан-Уул дүүрэгт энэ онд таван цэцэрлэг шинээр ашиглалтад оржээ. Үүний нэг нь болох 230 дугаар цэцэрлэг өнгөрсөн баасан гарагт үүдээ нээлээ. Тус дүүргийн хэмжээнд сургуулийн өмнөх 2-5 насны 12 мянга гаруй хүүхэд байгаа гэх стастистик тоо байдаг. 2015-2016 оны хичээлийн жилд төрийн өмчийн 27, төрийн бус өмчийн 63 нийт 90 цэцэрлэгт 10670 хүүхэд хамрагджээ.Шинэ цэцэрлэгийг тус дүүргийн Орон нутгийн хөгжлийн сангийн хөрөнгө оруулалт буюу 1.2 тэрбум төгрөгөөр “Баярс констракшн” ХХК барьж ашиглалтад оруулсан байна. 230 дугаар цэцэрлэг 150 ортой бөгөөд өнөөдрийн байдлаар тус дүүргийн 10-р хороо буюу Нисэхийн 269 хүүхэд, багачууд 6 бүлэгт хуваагдан хамрагджээ. Мөн ХУД-ийн 10, 14 дүгээр хороонд хоёр бага сургууль, цэцэрлэгийн цогцолбор удахгүй ашиглалтад орох аж.
