Энэ сарын 26-нд Өвөрхангай аймагт арван жилийн хүүхэд бусдад зодуулж амь насаа алдсан хэрэг гарсан байна. Талийгаач хүү арваннэг дүгээр ангийг сурагч бөгөөд энэ сарын 23-ны өдөр зодуулж, тархиндаа гэмтэл авч, цус харвасан байдалтайгаар аймгийн нэгдсэн эмнэлэгт хүргэгдэн иржээ. Талийгаач эмнэлэгт хүргэгдэж ирсэнээс хойш ухаангүй гурав хоносон бөгөөд 26-ны өдөр нас барсан байна.
Талийгаач хүү доод ангийнхаа нэг хүүхдийн гар утсыг булаагаад авчихсан байна. Гар утсаа булаалгасан хүү аавдаа хэлсэнээр энэ хэрэг манджээ. Тухайн хэрэг гардаг өдөр буюу энэ сарын 23-ны өдөр талийгаач хүү ангидаа их цэвэрлэгээ хийхээр явсан хүүг, утсаа булаалгасан хүүхдийн аав машинаар араас нь хөөсөн байна. Талийгаач хүү уг машинтай хүнээс зугтааж байсныг олон хүн харсан байна. Машинаас зугтаж, шинээр баригдаж байсан барилга руу авирсан байна. Энэ үед хүүг гүйцэж, Истана маркийн машинд суулгаад явж байхдаа зодсон гэнэ. Тухайн иргэн хүүхдийг аймгийн цагдаагийн газарт аваачиж өгчээ. Өвөрхангай аймгийн цагдаагийн хэлтэст очсон хүү хэсэг хугацаанд саатуулагдсаны дараа гарч ирэхдээ согтуу хүн шиг болсон байсан талаар ангийнхан ярьжээ.
Талийгаач хүү ангийнхандаа “Цагдаа нарт зодуулчихсан чинь толгой өвдөөд байна. Та нар чимээгүй болоод өг” хэмээн учирлаж байжээ. Ангиасаа гарч нэг найзынхаа гэрт очоод ухаан алдаж дахиж сэргээгүй байсаар гурав хоногийн дараа нас баржээ. Талийгаач хүү ухаан алдахаасаа өмнө цагдаа нар намайг зодсон гэж хэд, хэд дахин хэлсэн байна. Одоогоор тухайн хүүхдийг байцаасан цагдаа нарыг шалгаж байгаа аж. Мөн хүүг зодсон Б гэх иргэнд эрүүгийн хэрэг үүсгэн шалгаж эхэлсэн байна.
