НҮБ-ын Ерөнхий Ассамблейн чуулганаас 2017 оныг “Хөгжлийн төлөөх олон улсын тогтвортой аялал жуулчлалын жил” болгон зарлаж, дэлхийн аялал жуулчлалын байгууллагаас энэхүү жилийг “Аял.Таашаа.Хүндэл” сэдвийн тор тэмдэглэн өнгөрүүлнэ. "Ай Ти Эм Монголиа”-2017 олон улсын аялал жуулчлалын үзэсгэлэн Мишээл экспогийн үзэсгэлэнгийн танхимд 18 дахь жилдээ нээлтээ хийлээ. Үзэсгэлэн гурван хоног үргэлжилнэ. Амралтын өдрүүдэд Мишээл экспог зориорой.
Аялал жуулчлал нь дэлхийн эдийн засгийн хурдацтай өсч байгаа салбаруудын нэг бөгөөд дэлхийн нийт бүтээгдэхүүний 10 хувь, худалдаа үйлчилгээний 30 хувь, хөрөнгө оруулалтын долоон хувь, экспортын 10 хувийг тус тус эзэлж, ажил эрхэлдэг 11 хүн тутмын нэг нь уг салбарт ажлын байраар хангагдаж байна. Түүнчлэн сүүлийн жилүүдэд дотоодын аялал жуулчлал эрчимтэй хөгжиж байгаа бөгөөд 2016 онд давхардсан тоогоор нэг сая 900 мянга орчим Монгол иргэд гадаад улс орнууд уруу аялснаас үзэхэд манай улс жуулчин хүлээн авагч төдийгүй жуулчин илгээгч улсын хэмжээнд хүрсэн байна.
Манай улс өнгөрсөн онд 404 гаруй мянган жуулчин хүлээн авч, дотоодын эдийн засагт 312 сая гаруй ам долларын орлогыг оруулж, дотоодын нийт бүтээгдэхүүний 5,4 хувийг бүрдүүлжээ.
Улсын хэмжээнд нийт 274 тур оператор кампани, 473 зочид буудал, 385 жуулчны бааз үйл ажиллагаа явуулж, тус салбараас нийт 54000 ажлын байрыг бий болгосон байна. Үзэсгэлэнд оролцож буй бизнес эрхлэгчид бүтээгдэхүүнээ сурталчлан борлуулах, түншлэлийн гэрээ хэлэлцээр хийх, гадаад, дотоодын судлаачдын төрөлжсөн хэлэлцүүлэг, семинарт оролцох боломжийг бий болгодог зэрэг олон боломжийг энэхүү үзэсгэлэн нээж өгдөг юм.
Үзэсгэлэнд тур оператор компаниуд, зочид буудал, жуулчны бааз, гэст хаус, их дээд сургуулиуд, төрийн болон төрийн бус байгууллагууд, төсөл хөтөлбөр, агаарын тээврийн үйлчилгээ эрхлэгч авиа компаниуд, урлаг соёлын байгууллага, аялал жуулчлалын дагалдах бүтээгдэхүүн үйлдвэрлэгчид зэрэг нийт 200 гаруй байгууллага, бизнес эрхлэгчид оролцож үйл ажиллагаагаа сурталчилж байна. БОАЖЯ, Монголын аялал жуулчлалын холбоо албан ёсны түнш Ховд аймагтай хамтран зохион байгуулж байна.
