Манай улс төрийн хүрээнд нам ихэднэ үү гэхээс дутахгүй. Яаж ийж байгаад 800 хүнийг найрч, гарын үсгийг аваад Дээд шүүхэд бүртгүүлчихдэг болохоор бараг улс төрч болгон нам байгуулахаар санаархаж байна. Ер нь сүүлийн үед нам байгуулах нь гомдогсодын тайлал болсон гэхэд хилсдэхгүй. М.Энхсайхан, Н.Энхбаяр, Л.Гүндалай гээд л тунигчид сонгууль ойртохоор л нам байгуулж, үүнийгээ улс төрд шинэ салхи оруулж байна гэж тайлбарладаг ч үнэн хэрэгтээ хуйвалдаан зохион байгуулж, эвсэж хамтрахаас цааш үйл явдал өрнөдөггүй билээ.
Яг л ийм үзэгдэлийг УИХ-ын гишүүн С.Ганбаатар давтчихлаа. Түүнийг нэлээд эртнээс ХҮН буюу Хөдөлмөрийн үндэсний намтай холбоотой, үүсгэн байгуулагч хэмээн хэвлэлийнхэн зарлаж байсан ч тэрбээр өдий болтол үгүйсгэж ирсэн. Эхлээд ямар ч намд орох сонирхолгүй байна гэж байснаа “Намайг ямар намд элсэхийг Дарханчууд шийднэ” гэж шоудсан. Харин хамгийн сүүлд "Эрх баригчид сонгуулийн болон бусад хууль тогтоомжид өөрчлөлт оруулах замаар ирэх сонгуульд бие даагч гишүүдийн маш их хавчих гэж байгаа. Тиймээс бие даагч гишүүд бид цаашид хэрхэхээ ярилцаж, нэгдсэн шийдэлд хүрэхээр зэхэж байгаа. ХҮН-ын тухайд би урилгаар очиж лекц уншдаг, харилцан ярилцаж, санал солилцдог" хэмээн ярьсан байдаг.
Өөрөөр хэлбэл намд элсэх эсэх талаар тодорхой хариулт өгөхөөс татгалзсан юм. Тэгвэл тэрбээр өчигдөр буюу Үндэсний эрх чөлөө, тусгаар тогтнолоо олсон Богд хаант Монгол Улсыг байгуулсан баярын энэ өдөр тус намд элсч, намын батлахаа гардаж авлаа. Гэхдээ түүний энэ үйлдлийг өнөөх сонгуультай холбохгүй байх шалтгаан олсонгүй. Уг нь тэрбээр Монголдоо рейтинг өндөртэй улс төрчдийн нэг. Максимагийн судалгаагаар С.Ганбаатар үргэлж тэргүүлж буй. Мөн улс төрчдийн рейтингээрээ эхний 10-т байнга багтаж, Монгол Улсын Ерөнхийлөгч Ц.Элбэгдорж, Ерөнхий сайд асан С.Баяр, С.Батболд, Н.Алтанхуяг, УИХ-ын гишүүн Х.Баттулга нартай энэ зэрэгцдэг.
.PNG)
Учир нь тэрбээр аль намд үйлчилдэггүй, хэн нэгний эрхшээлд байдаггүй бие даагч байсан болохоор тэр. МАНАН, МАХН зэрэг аль алинаасаа ялгагдахаа байсан улс төрийн хүчнүүдээс ард түмэн залхчихсан учраас түүний үгийг сонсдог байсан. Харин одоо тэрбээр бусдаасаа ялгагдахааргүй боллоо. Нөгөөх муу хэлээд байсан Н.Алтанхуяг, Ц.Элбэгдорж, Ч.Сайханбилэг, З.Энхболд, М.Энхболд шигээ болчихов. Тэгэхээр түүнийг дахин ард түмэн сонгох уу. Хэрээ хэрээнийхээ харыг гайхав гэгчийн үлгэрийг нь сонсох болов уу.
Түүний сонгосон, байгуулсан гэдэг ХҮН нам айхтар төлөвлөгөөтэй. Мөнгөтэй, баячуудыг элсүүлж буй тус намыхан 2016 оны УИХ-ын сонгуульд найман суудал авна хэмээн тооцоолжээ. Зорилго нь бүлэг байгуулах юм гэнэ. Харин 2020 онд “Хүн” улс төрийн нам эрх барих төлөвлөгөө боловсруулсан байна. УИХ-ын гишүүн С.Ганбаатарын хувьд 2017 оны Ерөнхийлөгчийн сонгуульд нэр дэвших санаатай гэх. Ямартай ч түүнийг ХҮН намд элссэнийг улс төрийн рейтингээрээ тэнчин тавьсан, болчимгүй үйлдэл, “С.Ганбаатар ХҮН намд "элсэн орлоо" гэдэг нь бутач хүүхэд эцгээрээ овоглож эхэлсэнтэй агаар нэг бөлгөө, Ганбаатар гишүүн ХҮН намын рейтинг унагаахаа болио. ХҮН нам С.Ганбаатартай холбоотой гэвэл хүмүүс дэмжихгүй шүү. Түрдээ нуугддаг юм уу, нуудаг юмуу” хэмээн егөөдөх хүн байгаа бол нөгөө хэсэг нь эсрэгээрээ дэмжиж байна.
