Өнөөдөр өглөө Ерөнхийлөгчийн сонгуульд нэр дэвшигчид Сонгуулийн ерөнхий хорооноос үнэмлэхээ гардаж авлаа. Энэ үеэр нэр дэвшигч М.Энхболд, болон МАХН-аас нэр дэвшигч С.Ганбаатар нар юу гэж хэлсэн талаар мэдээлэл хүргэе.
М.Энхболд: Эв эвдэрсэн үедээ монголчууд ээдэрч явсан удаатай
Зуны эхэн сарын шинийн хоёрны билэгт сайн өдөр Монгол Улсын Ерөнхийлөгчийн сонгуульд нэр дэвшигчийн үнэмлэхээ гардан авлаа. МАН-аас нэрийг минь дэвшүүлж, ихээхэн итгэл найдвар, хариуцлагатай үүргийг хүлээлгэж байна. Энэхүү үүргийг ард түмнийхээ хүчээр шударга өрсөлдөж, ялалтаар хариулах болно гэдэгтээ итгэлтэй байна. Монголчууд эвтэй байхдаа эх орныхоо хөгжил цэцэглэлтийг бүтээж явсан түүхтэй. Эв эвдэрсэн үедээ монголчууд ээдэрч явсан удаатай. Тиймээс нэг байр суурь, нэг зүг рүү харж гэмээнэ ялалт байгуулна. МАН-аас нэр дэвшигч ялалт байгуулж байж, улс орон эдийн засгийн хямрал, хүнд байдлаас гарна. Монголчууд НЭГ МОНГОЛ болохын төлөө зайлшгүй ялалт байгуулах ёстой. Үнэн шударга өрсөлдөж бүгдээрээ ялалт байгуулъя. Миний хувьд ЭЭЛТЭЙ, ЭВТЭЙ МОНГОЛЫН ТӨЛӨӨ нэр дэвшиж байна. Монгол ялах болно
МАХН-аас нэр дэвшигч С.Ганбаатар: Хар пиарчид бүгд МАНАН дээр цугласан байна
Би маш олон доромжлол гүтгэлгийн дундуур явж ирлээ. Үнэн гүйцдэг юм байна. Би МАХН-ын нийт гишүүд, ард түмэнтэйгээ хамт нэр дэвшиж байна. Ямар зорилгоор дэвшиж байна вэ гэхээр МАНАН-гийн дарангуйллыг хазаарлах гэж. Өнөөдөр улс орон эдийн засгийн доройтолд орж байна. Сая МАН-ын сонгуулийн ажил эхэлж байх шиг байна. Тэд юундаа баярлаад байгаа юм бэ. Уучлалт гуйж эхлэх ёстой. Тэд ард түмнийг хямраасандаа уучлалт гуйх ёстой. Тэдний лицензийг наймаа, ашиг сонирхол Монголын ард түмнийг доройтуулж байна. Хар пиарчид бүгд МАНАН дээр цугласан байна.
Өнөөдөр өөр сонголт хийж, хэн илүү мөнгөтэй нь биш хэн илүү төлөвлөгөөтэй нь ялах хэрэгтэй. Миний сэтгэл хөдөлж байна. Би Монголын ард түмэн сайхан амьдралын төлөө зүтгэж байна. Түүнээс 30 гэрийн бүлийг баяжуулахын төлөө зүтгээгүй. Би Ерөнхийлөгчөөр сонгогдвол эздийн холбоо, үйлдвэрчний эвлэлийг хүчирхэг болгоно. Монголын ард түмэн ялна. Монгол босно хэмээн хэллээ.