Монгол Улсын Ерөнхийлөгчийн ээлжит сонгуулийг хөндлөнгөөс ажигласан олон улсын сонгуулийн ажиглагчид урьдчилсан үнэлэлт дүгнэлтийг танилцуулж, мэдээлэл хийлээ. Олон улсын сонгуулийн ажиглалтын хороо нь ЕАБХАБ-ын Ардчилсан институт, хүний эрхийн газар, ЕАБХАБ-ын Парламентын ассемблей болон Европын парламентын хамтарсан үйл ажиллагаа явуулдаг аж. Олон улсын ажиглагчдын хороо нь гадаадын 30 улсаас ирсэн 66 ажиглагчаас бүрдэж байгаа бөгөөд үүнд ЕАБХАБ-ын Ардчилсан институт, хүний эрхийн газраас илгээсэн урт хугацааны 35 ажиглагч, шинжээч, ЕАБХАБ-ын Парламентын ассемблейг төлөөлж буй 22, Европын парламентыг төлөөлж буй 9 парламентын гишүүн болон холбогдох албан тушаалтнууд багтаж байгаа юм.
Хэвлэлийн хуралд Европын аюулгүй байдал хамтын ажиллагааны байгууллагын Тусгай зохицуулагч, богино хугацааны ажиглагчдын багийн удирдагч Гилиелмо Пики, Европын парламентын төлөөлөгчдийн тэргүүн Лайма Андрикиене, ЕАБХАБ-ын Парламентын ассемблейн төлөөлөгчдийн тэргүүн Ёориос Ваременос болон ЕАБХАБ-ын Ардчилсан институт, хүний эрхийн газрын Сонгууль ажиглах хязгаарлагдмал хорооны тэргүүн, элчин сайд Гээрт-Хинрич Аренс нар оролцов.
Монгол Улсын Ерөнхийлөгчийн сонгууль өрсөлдөөнтэй, зохион байгуулалт сайтай болж өнгөрлөө гэв. Гэхдээ шүүхийн шатанд байгаа хэргүүдээс шалтгаалан нэр дэвшигчдийн талаар сонгогчдод эргэлзээ төрүүлэхэд хүргэсэн болов уу хэмээн олон улсын ажиглагчид хэллээ. Мөн хэвлэл мэдээллийн хэрэгслээр сонгуулийн сурталчилгаа өргөн дэлгэр цацагдсан хэдий ч дүн шинжилгээ хийх мэдээллээр дутмаг байлаа гэж дүгнэсэн байна. ЕАБХАБ-ын Тусгай зохицуулагч, богино хугацааны ажиглагчдын багийн удирдагч Гилиелмо Пики "Энэ удаагийн сонгууль нь өрсөлдөөнтэй, Монгол Улсын ардчиллын зарчмаар явагдаж, өгөөжтэй сонгууль болж өндөрлөлөө. Шүүхийн шатанд нэр дэвшигчидтэй холбоотой хэргүүд шийдвэрлэгдэхгүй хүлээгдэж байгаа нь эргэлзээ, төөрөгдөл төрүүлж байгаа тул үүнийг анхаарах хэрэгтэй. Хоёр дахь шатны санал хураалтаар сонгуулийн эерэг үйл явц бүхэлдээ дахин баталгаажна гэдэгт би найдаж байна” гэсэн юм.
Мөн Сонгуулийн ерөнхий хороо нь сонгуульд оролцогчдын итгэлийг хүлээж, богино хугацаанд багтаан, ил тод байдлаар мэдээлэл хүргэж ажилласан хэмээн дүгнэлтэд тэмдэглэсэн байна. Нэр дэвшигчид асуудлыг хөндөхдөө харилцан биенээ буруутгаж байсан нь үнэмшихүйц мэдээлэл болж чадсангүй. Иймд сонгуулийн сурталчилгаа нь сонгогч ялангуяа залуучууд саналаа өгөхөд хойрго хандахад нөлөөлсөн гэж ажиглагчид дүгнэжээ.
