Ойрын хугацаанд шатрын хэд хэдэн томоохон тэмцээн болох юм байна. Тухайлбал, Дэлхийн шатрын холбооны ивээл дор Герман улсын Дресден хотноо Хөгжлийн бэрхшээлтэй шатарчдын ДАШТ болох аж. Тус тэмцээний бүртгэл эхэлжээ. Тэмцээн намар аравдугаар сарын 05-13-нд гурван ангиллаар явагдах юм байна. Тулгуур эрхтэн, сонсгол, харааны бэрхшээлтэй тамирчид гэсэн гурван ангилалтай. Мөн тус тэмцээнд оролцогчид нь дэлхийн чансаанд бүртгэлгүй эсвэл 2100 буюу түүнээс доош чансаатай байх ёстой бөгөөд харьяа холбоогоор дамжуулж нэгдсэн багийн бүртгэл хийх ёстой юм байна. Харин нэг баг 4 хүний бүрэлдэхүүнтэй байх аж. Тэмцээн Швейцари системээр 7 өрөг тоглох бөгөөд цагийн хяналт 90 мин/40 нүүдэл+30 мин /ингэхдээ нүүдэл бүрт 30 сек нэмэгдэнэ/ байх юм. Хүлээлгийн цаг 15 минут байна гэжээ. Тэмцээний бүртгэлийг Монголын Олимпийн Хорооны 204 тоотод 8 сарын 10-ыг дуустал авах юм байна.
Мөн 14, 16 болон 18 хүртэлх насны өсвөрийн шатарчдын ДАШТ есдүгээр сарын 16-аас есдүгээр сарын 26-нд Уругвай улсын Монтевидео хотод болно. Бүх ангилалд нэг нэг тамирчин байх ёстой бөгөөд уг тэмцээний бүртгэл 08 сарын 15-ыг хүртэл мөн Олимпийн хороонд байрлах оффист болж байгаа аж.
Үүнээс гадна Азийн хотуудын багийн аварга шалгаруулах тэмцээн буюу Дубай-2017 тэмцээний бүртгэл уг байранд 8 сарын 10-ыг хүртэл болж байна.
Мөн Дэлхийн Цом 2017 тэмцээний оноолт гарсан байна. Тус тэмцээнд манай улсаас Их Мастер Ц. Батчулуун оролцож байгаа юм. Тэрээр эхний шатанд Английн шатарчин Майкл Адамстай учраа таарсан байна.Манай тамирчин дэлхийн чансааны 106-д байгаа бол түүний өрсөлдөгч нь 23 дугаар байранд яг одоо эрэмбэлэгджээ.
