Сонгинохайрхан дүүрэг дэх цагдаагийн нэгдүгээр хэлтсийн алба хаагчид албан үүргээ гүйтгэж явахдаа галын аюулаас хүний амь нас аварсан баатарлаг, буянтай үйлс бүтээлээ.
Алба хаагчид 18, 19 дүгээр хорооны нутаг дэвсгэрт машинт эргүүлийн үүрэг гүйцэтгэж байх үед шөнийн 02:40 цагт “СХД-ийн 18 дугаар хороо ... байрны ... тоотод манай охиныг зодсон байна” гэх дуудлага иржээ. Дуудлагын дагуу шуурхай очиход уг дуудлага өгсөн байрны нэгдүгээр орцны гуравдугаар давхарт гал гарч байжээ. Цагдаагийн ахлах дэслэгч Э.Хатанбаатар МШУТ-ийн 105 дугаарын утсанд дуудлага өгч, эргүүлийн цагдаа, цагдаагийн дэд ахлагч О.Хишиг-Эрдэнэ орцны хаалга кодтой, түгжээтэй байсан болохоор гараашаар нь дамжин орж хаалгыг дотроос нь нээж, алба хаагчид хамтдаа ороод, гал гарч байгаа айлд орж 43 настай, иргэн Г-г угаартсан байдалтай, ухаан алдсан байсныг гадаа гаргасан байна. Мөн тус орцны гурваас наймдугаар давхар хүртэлх айл өрхүүдийг сэрээж, галын аюулаас урьдчилан сэргийлж ажиллажээ.
Өргөсөн тангарагтаа үнэнчээр зүтгэж, албан үүргээ нэр төртэй гүйцэтгэсэн алба хаагчдадаа талархал илэрхийлье.
