Гэгээн хүсэл мөрөөдлөөр жигүүрлэсэн шинэхэн өдөр буурал түүхийн хуудаснаа хадгалагдан үлдэж байна. Өнөөдрийн таны ажил амжилт бүтээлээр дүүрэн байсан гэдэгт итгэлтэй байна.Гишгэсэн мөрөө эргэж нэг хар. Гутлын улныхаа хээг биш, хvн болж тереед хийж бvтээснээ, хэрхэн амьдарсанаа эргэж хар.

Нигүүлсэнгүй байж чадаагүй хором бүрээ тунгааж бодоорой. Сайн сайхан амжилт бүтээлээ ч тэмдэглэ. Маргааш чамайг илүү сэргэг, илүү нигүүлсэнгүй байхад чинь энэ санамж тус болно. Өглөө босохоос орой унтах хүртэлх байр байцаа нэхэн санахдаа саарт нь гутарч, сайнд нь сагсуурах хэрэггүй. Учир нь маргааш таныг нэгэн шинэ өдөр угтах болно. Өглөө бүрийг шинэ өдөр, шинэ боломж хэмээн талархан угтаарай. Нийгэм улс төрийн амьдралд халуун сэдвүүд өрнөсөн энэ өдрийн үйл явдлыг тоймлон хүргэдэг “Монголын нэг өдөр” тойм булангаа хүргэх гэж байна. Шинэ сонин содон мэдээллээр дүүрэн тоймоо хүлээн авна уу.

Өнөөдөр манай хэвлэлийн хуудаснаа:

Ж.Эрдэнэбат: Би нэг л хүнээс мөнгө авч, томилгоо хийсэн байдаг юм бол огцорход бэлэн байна

 

Төрийн байгуулалтын байнгын хорооны хуралдаан боллоо.. 19 гишүүнээс 17 нь хуралдаанд оролцлоо.. Хуралдаанаар Ерөнхий сайдыг огцруулах эсэх саналыг хэлэлцэж байна. Энэ үеэр Ерөнхий сайд Ж.Эрдэнэбат " Хэрвээ би нэг л хүнээс мөнгө авч, томилгоо хийсэн байдаг юм бол огцорход бэлэн байна.  800 тэрбумын концессыг та өөрийнхөө бүлгийн дарга Д.Эрдэнэбатаас асуусан дээр байх. Манай Засгийн газар бол Хан-Уул дүүрэгт 800 ортой хүүхдийн эмнэлэг, нөгөө нь авто замын концесс өгсөн. Хууль хүчний байгууллагын асуудал яагаад орж ирж байгааг та нар мэдэж байгаа. Ямар нэгэн байдлаар миний зүгээс зохион байгуулсан зүйл байхгүй" хэмээн байр сууриа илэрхийллээ. 

Харин АН-ын бүлгийн дарга Д.Эрдэнэбат " Гурван жилийн өмнө Н.Алтанхуягийн Засгийн Газрыг унагааж байхад нэг үг хэлж байсан юм. Тэрийг өнөөдөр хэлье гэж бодож байна. Засгийн газрыг олонхи биш цөөнх унагадаг юм гэж би хэлж байсан. Үүнийг дахин давтан хэлж байна. Одоо наад хэрүүлээ дотооддоо шийдээчээ. Улс төрчдийн ёс зүй алга. Асуудлаа нэг тийшээ шийдээчээ. Төрийн албыг чанаргүйжүүлсэн 22 мянган хүнийг халсан. Мэдээж бид цөөнх. Гэхдээ манай нам ард түмний тал байна. Ард түмэн бид нарыг биш та нарыг харж байна. Та бүхний хэрүүл явж явж хэдхэн хүний эрх ашиг болж хувирлаа. Танай нам төрийн албыг чанаргүйжүүлж, өнгөрсөн сонгуулиар ард түмнээс үнэлгээгээ авсан. АН ард түмнийхээ талд л зогсоно. 65-ын бүлэг хийж чадна л гэж ажлаа авсан. Бид бол сөрөг хүчин, есхөн суудал юу юм бэ. Олонхи асуудлаа шийднэ " гэв. 

Төрийн байгуулалтын байнгын хорооны хуралд ирсэн 17-нээс найман Засгийн газрыг огцруулахыг зөвшөөрч, 9 нь татгалзлаа.

Засгийн газрыг огцруулахыг зөвшөөрсөн гишүүд: Б.Жавхлан, С.Батзориг, Ж.Батзандан, Л.Оюун-Эрдэнэ, Д.Сумъяабазар, Тогтохсүрэн, Д.Эрдэнэбат, Т.Аюурсайхан 

Засгийн газрыг огцруулахыг татгалзсан гишүүд: Б.Ундармаа, Д.Хаянхярваа, Н.Цэрэнбат, Н.Энхболд, М.Энхболд, Ж.Эрдэнэбат, Я.Содбилэг, Д.Лүндээжанцан, Ж.Мөнхбат нар татгалзлаа.

Хэдэн өдрийн өмнөөс яригдаж ирсэн МАН-ыг бүлгийн хурал өчигдөр эхэллээ. Хуралдааны ирц бүрдэж, хуралдаан хаалттай горимд шилжиж үргэлжилсээр шөнийн 22.00 цаг хүртэл хуралдлаа. Өнөөдөр ч үргэлжилнэ. Өчигдрийн МАН-ын бүлгийн хуралдаан өмнө нь байгаагүйгээр өндөр хамгаалалтын дор явагдлаа. Учир нь МАН-ын бүлэг хуралдаж байгаа жигүүрийг тэр чигт нь хамгаалагч нар хамгаалалтанд авсан талаар эх сурвалж онцлов.  Мөн утасны сүлжээ унагаагч байршуулжээ. Засгийн газрыг огцруулах болон Шадар сайдыг үүрэгт ажлаас нь чөлөөлөх асуудал хэлэлцэж байгаа учраас бүлгийн хурал нэлээд ширүүхэн өрнөж, гишүүд ч багагүй маргалдсан талаар зарим гишүүд ам нээсэн юм.

Засгийн газрыг огцруулах болон Шадар сайдыг үүрэгт ажлаас нь чөлөөлөх асуудал хэлэлцэж байгаа учраас бүлгийн хурал нэлээд ширүүхэн өрнөж, гишүүд ч багагүй маргалдсан талаар зарим гишүүд ам нээсэн юм.

Тус хуралдаанд УИХ-ын дарга М.Энхболд, Ерөнхий сайд Ж.Эрдэнэбат, Шадар сайд У.Хүрэлсүх, ЗГХЭГ-ын дарга Ж.Мөнхбат, Сангийн сайд Б.Чойжилсүрэн нарын 40 гаруй гишүүн оролцож байгаа. Засгийн газрыг огцруулахаар гарын үсэг зурсан 30 гишүүн бүлгийн хуралдаанд оролцохгүй гэсэн мэдээлэл гараад байсан ч тэдгээр гишүүдийн төлөөлөл үүнийг үгүйсгэж, бүлгийн хуралдаандаа оролцлоо. Үүнээс харахад  - 10 биш, + 11 болж тараад байх шиг байна. Энэ томъёолол их энгийн. МАН-ын гишүүд Засгийн газраа огцруулахаа 30 гаруй гишүүн гарын үсгээ зурж албан бичгээ УИХ-д өргөн барьсан. Баттай эх сурвалжийн мэдээлснээр эдгээр 30 гишүүн дээр нэмж МАН-ын 11 гишүүн Засгийн газраа огцруулах саналыг дэмжиж гарын үсгээ зурсан аж. Энэ нь +11 юм. Цаашид энэ тоо ч нэмэгдэх хандлагатай байгааг МАН-ын зарим гишүүд ярьж байна. Гэтэл өчигдрийн МАН-ын бүлгийн хуралдааны өмнө Засгийн газрыг огцруулахаар гарын үсэг зурсан гишүүдээс 10 гишүүн нэрээ татсан гэх мэдээлэл гарч эхэллээ. Энэ нь -10 юм. Бүлгийн хуралдааны үеэр УИХ-ын зарим гишүүд энэхүү асуултад хариулт өгч байр сууриа илэрхийлсэн юм. Тэдний хэлснээр “гарын үсэг зурсан гишүүдээс хасагдсан зүйл байхгүй. Хасагдахгүй. Бид энэ байр сууриа хатуу хамгаална” гэх мэтээр өөр өөрсдийн байр сууриа илэрхийлэв. Бичлэгийг http://chuhal.mn/r/24918, http://chuhal.mn/r/24917 эдгээр линкээр орж үзнэ үү. 

Энэ талаар УИХ-ын гишүүн Ж.Ганбаатараас тодруулахад "Засгийн газрыг огцруулахаар гарын үсэг зурснаасаа буцна гэсэн ойлголт байхгүй. Хүмүүсийн яриад байгаа шиг гарын үсэг зурсан гишүүдийг дарамталсан, тендер санал болгосон гэсэн мэдээлэл бол худлаа мэдээлэл. Би Засгийн газарт орж ажиллахгүй.  Би ер нь Засгийн газраас нэг ч тендер авч үзээгүй, надад хувийн ямар нэг ашиг сонирхол байхгүй. Миний хувьд Засгийн газрыг огцруулах санал дээрээ хатуу зогсоно" хэмээн хэлсэн

Монгол Улсын Ерөнхийлөгч Х.Баттулга бүх нийтэд хандсан анхны зарлигаа гаргаж, жил бүрийн 9 дүгээр сарын 1-ний өдрийг “Эх хэлний өдөр” болгон зарлалаа. Монгол Улсын Ерөнхийлөгч Х.Баттулгын 8 дугаар сарын 25-нд гаргасан “Эх хэлний өдөр зарлах тухай” 25 дугаар зарлигийг гардуулах ёслол өнөөдөр Ерөнхийлөгчийн дэргэдэх Иргэний танхимд болов. Зарлиг гардуулах ёслолд Монгол Улсын Ерөнхийлөгчийн Тамгын газрын дарга З.Энхболд, Ерөнхийлөгчийн Соёл, шашны бодлогын зөвлөх Ц.Хулан нар оролцов. Ёслолын эхэнд Монгол Улсын Ерөнхийлөгчийн туслах Д.Мөнхбадрал “Эх хэлний өдөр зарлах тухай” зарлигийг уншин сонордууллаа.

Уг зарлигт “Үндэсний аюулгүй байдал, тусгаар тогтнолын баталгаа  болсон  язгуур  соёл, өв уламжлал, төрт ёсны түүхээ дээдлэн хамгаалж, төрийн албан бичиг баримтыг хуульд нийцүүлэн хөтлөх, хэвлэл мэдээллийн хэрэгслээр эх хэл, түүх соёлоо сурталчлах, иргэн бүр төрөлх монгол эх хэлээрээ зөв ярьж, зөв бичих бүх ард түмний хөдөлгөөн өрнүүлэх зорилгоор,

1. Жил бүрийн 9 дүгээр сарын 01-ний өдрийг “Эх хэлний өдөр” болгон зарласугай.
2. Монгол Улсын нийт ард иргэд, айл өрх, төрийн болон төрийн бус байгууллага, аж ахуйн нэгж, бүх шатны сургалтын байгууллагууд “Эх хэлний өдөр”-ийг  жил бүрийн энэ өдөр уламжлал болгон тэмдэглэн өнгөрүүлсүгэй.
3. “Эх хэлний өдөр”-ийг тэмдэглэх арга хэмжээний хүрээнд:

а/ Бүх нийтээр монгол хэлний хэм хэмжээг дагаж мөрдөх, төрийн болон захиргааны албан бичиг хэрэг хөтлөлтийг монгол хэлний зөв бичих дүрэм, орчин цагийн утга зохиолын монгол хэлний хэм хэмжээнд нийцүүлэх, монгол хэл бичиг, кирил үсгийн дүрмээ сурч судлах, өвлөх, өвлүүлэх, эзэмших, хэрэглэх, хамгаалах, хөгжүүлэх талаар санаачилга гарган ажиллах;

б/ “Эх хэлний өдөр”-ийг угтаж, олон нийтийн хэвлэл мэдээллийн байгууллагууд эх хэлээ сурталчлах, түүгээр бахархах, олон нийтэд түгээн дэлгэрүүлэхэд чиглэсэн эх хэл соёл, түүх, зан заншил, өв уламжлалын тухай мэдээ мэдээлэл, нийтлэл, нэвтрүүлгийг орон даяар нэвтрүүлэхийг  хэвшүүлж ажиллахыг уриалсугай.

4.Монгол Улсын их, дээд сургууль, мэргэжлийн боловсрол, сургалтын байгууллага, ерөнхий боловсролын сургууль болон сургуулийн өмнөх боловсролын байгууллагууд жил бүрийн “Эх хэлний өдөр”-ийн хичээлийн нэгдүгээр цагийг монгол хэл, монгол уран зохиол, Монголын түүхийн хичээлийн сэдэв агуулгад багтаан явуулахыг Боловсролын асуудал эрхэлсэн төрийн захиргааны төв байгууллагад даалгасугай” гэжээ.

Монгол Улсын Ерөнхийлөгчийн Тамгын газрын дарга З.Энхболд зарлиг гардуулж хэлсэн үгэндээ “Монгол Улсын Ерөнхийлөгч Х.Баттулга бүрэн эрхээ хэрэгжүүлж эхэлснээс хойш ард түмэндээ хандсан, бүх нийтийг уриалсан анхны зарлигаа гаргасан нь Эх хэлний өдөртэй болох тухай 2017 оны 8 дугаар сарын 25-ны өдрийн 25 дугаар зарлиг юм.

ХБНГУ-ын Хамбург хотноо зохион байгуулж буй сонирхогчдын боксын насанд хүрэгчдийн дэлхийн аварга шалгаруулах тэмцээний 60 кг жинд медалийн төлөөх тулаан хийсэн гавьяат тамирчин Д.Отгондалай  Венесуэлийн тамирчныг 5:0 харьцаагаар яллаа.    Тэрбээр ийнхүү олимп, ДАШТ-ий хос медальтан боллоо. Тэрбээр ирэх сарын сарын 1-нд мөнгөн медалийн төлөө Олимпийн мөнгөн медальт Францын тамирчинтай медалийн өнгөө хувиргахын төлөө хүч, ур чадвараа сорих юм байна. 

Хан-Уул дүүргийн 10 дугаар хорооны нутаг дэвсгэр, Морингийн даваа буюу нисэхийн зурвасын хойд хэсгийн суурьшлын бүсэд шүлхий өвчний улмаас хөл хорио тогтоогоод байгаа билээ. Тус хэсгийн нийт 12 км радиуст хөл хориог тогтоосон бөгөөд голомтоос гадагш гарах хөдөлгөөнийг хорьж, гаднаас дотогш хоол хүнс, эм тариа зэрэг зүйлийг холбогдох мэргэжилтнүүдийн хяналтан дор нэвтрүүлж байгаа юм.

Хан-Уул дүүргийн Мэргэжлийн хяналтын хэлтсийн Мал эмнэлгийн хяналтын улсын байцаагч М.Цэвэлмаа ”2017 оны  намдугаар сарын 25-нд голомтоос дуудлага ирсэн.  Дуудлагын дагуу мал эмнэлгийн эмч нартай ирж үзлэг хийгээд дээж аван шинжлэхэд шүлхий өвчний  шинж тэмдэг илэрсэн. Ингээд 2017 оны наймдугаар сарын 26-нд хотын даргын захирамж гарсанбайгаа. Бид энэхүү захирамжийн дагуу ажиллаж байна. Хөл хорио тогтоосноос хойш өвчний шинж тэмдэг нэмж илрээгүй” гэв.

Хан-Уул дүүргийн Онцгой байдлын хэлтсийн Гал түймрийн улсын ахлах байцаагч Б.Цогтоо “Морингийн давааны баруун, зүүн талд 4 км, гэр хорооллын урдаас хойш 4 км нийт 12 км радиуст хязгаарлалтын дэглэм тогтоосон байгаа. Энэ хэсэгт нийт 16 постод онцгой байдал, мэргэжлийн хяналт, цагдаа, мал эмнэлэг, зооноз судлал зэрэг мэргэжлийн байгууллагын ажилтан алба хаагчид ажиллаж байна. Хязгаарлалт тогтоосон газар буюу Морингийн даваанд 740 орчим  айл өрхийн 2300 гаруй иргэн амьдардаг. Голомтоос ямар нэгэн зүйлийг гаргахыг хорьсон. Гаднаас хоол хүнс, эм тариа оруулах зэргийг албаныхны хяналтан дор чөлөөтэй нэвтрүүлж байгаа. Мэргэжлийн байгууллагууд ариутгалын бодисын нөөцөө хангалттай татчихсан гэр хорооллын бүсийн гудамж талбайг ариутгаж байна

Ховд аймгийн Жаргалант сумын төвд тарваган тахал өвчин гарч нэг иргэн өвчлөөд буй. Урьдчилсан байдлаар уг тахлыг уушигны хэлбэрийнх гэж оношилж байсан бол Зооноз өвчин судлалын үндэсний төвөөс өчигдөр 17.30 минутын албан ёсны шинжилгээний хариу гарчээ. Тодруулбал, уг өвчин нь залгиур булчирхайн төрлийнх гэдэг нь батлагджээ. Өвчтөний биеийн байдал одоогоор хэвийн байгаа юм байна.

Халдвар тархах зэрэг болзошгүй эрсдэлээс сэргийлэхийн тулд аймгийн Онцгой комиссын шийдвэрээр 8 сарын 30-ны 23 цаг хүртэл хөл хорио тогтоосон. Энэхүү өвчний эх үүсвэр болсон тарвагыг Баян-Өлгий аймгийн Дэлүүн сумаас 7 сарын 20-26-ны хооронд агнасан болох нь тогтоогдсон байна.