Монголчууд намрын эхэн сар адаг сарт адуугаа тамгалдаг уламжлалтай. Монгол адуу, адууны тамга хоёр нүүдэлчин монголчуудын амьдралд хамгийн том байр суурь эзэлдэг учраас ихээхэн хүндэтгэлтэй ханддаг. Дэлхийн олон угсаатан ард түмний дотор харилцан холбогдох харь элэгтэн, хамаатан саднаа ялгах олон тэмдэг эртнээс үүссэн байдаг. Овгийн дотор хөдөлмөрийн хуваарь үүсэхийн хэрээр өөрийн өмч хөрөнгөө ялгах, таних мэдэх хэрэгцээнээс тамга тэмдэг үүссэн. Монголчууд МЭӨ 1 мянган жилийн тэртээгээс мал сүргээ тамгалж эхлэсэн түүхтэй. Тэгвэл тэр үеэс монголчууд адуугаа тамгалахдаа монгол ёс заншилаа дээдэлсэн тамгаар тамгалдаг байсан. Харамсалтай нь сүүлийн үед хөдөөгийн зарим иргэд “Toyota”, “Lexus”-ийн логогоор адуугаа тамгалдаг болсон байна. Тодруулбал, Төв аймгийн Баян, Эрдэнэ сумын малчид “мерседес”, “лексус”, “тоёото” машины логогоор адуугаа тамгалсан байна. Үүнийг харсан монгол хүмүүс, ахмад малчид, уяачид маш их эсэргүүцэж байна.
