Монголын төдийгүй гадныхны анхаарал татсан талийгаач Т.Лхагвасүмбэрэлийн хэргийн талаар өчигдөр Цагдаагийн байгууллагаас мэдээлэл хийсэн нь олон хүнд эргэлзээ төрүүлж эхэллээ. Цагдаагийнхан хэргийг шалгаж байгаа юу эсвэл арьсаа хамгаалах гэж ийм үйлдэл гаргав уу гэх асуулт цахим ертөнцөд давалгаалсаар байна. Цагдаагийнхан мэдээлэл гаргасны дараах нь УИХ-ын гишүүн Ц.Оюунгэрэл "Живж үхэх, живүүлж алах хоёуланд нь задлан шинжилгээ адил гарна. Хоёрдугаар хувилбар магадлалтайг бас хэлсэн бол цагдаа нөлөөнд автаагүйгээ нотлох байлаа" хэмээн байр сууриа илэрхийлсэн билээ. Үнэндээ цагдаагийнхан мэдээлэл хийх нэрээр шүүх шинжилгээний дүгнэлт болоод нэгэнт ил болсон мэдээллийн талаар сүр дуулиантайгаар дэлгэсэн. Талийгаач живж үхсэн, машинаас нь 0,5 шилтэй архи олдсон. Амиа алдах үедээ бага зэргийн согтолттой байсан, өмнө нь 4,5 см хутгалуулсан байсан, халдлагад өртөхдөө цагдаагийн байгууллагад нэг ч удаа хандаж байгаагүй гээд л. Үнэндээ талийгаачийг живж нас барсан гэдгийг хэн ч мэднэ. Гагцхүү цагдаагийн байгууллага живсэн үү, живүүлсэн үү, архийг өөрөө уусан уу, ам руу цутгасан уу, бичлэг дээр гарч байгаа дуу авиа ямар тохиолдол яаж дуугарах вэ гэдгийг шалгах ёстой баймаар.
Хамгийн сонирхолтой нь ингэж мэдээлэл өгөхдөө зарим нэгийг зөрүүлж хэлсэн. Талийгаачийн аав “Цензургүй сурвалжлага”-нд дурдаж байгаагаар хамгийн эхлээд цагдаагийн байгууллага машин дотроос нэг гар утсыг нь олсон. Аавынх нь зүгээс талийгч хүүгийнхээ куртикны халаасанд эсвэл усанд өнөөх гар утсыг унасан байж магадгүй гэж бодож байсан учраас Онцгойгийн алба хаагчдад утсыг заавал уснаас хайх ёстой гэж хэлж байжээ. Гэвч аав нь өөрөө машин дотроос утсыг нь олсон гэж байв. Тэрбээр цагдаагийнхан аль хэдийнэ үзлэг хийгээд явсаны дараа талийгаачийн машин дотроос нь буюу жолоочийн суудал голын хайрцаг хоёрын завсраас гар утсыг аав нь олсон байдаг. Гар утсыг цэнэглэж үзэхэд маш ноцтой хоёр бичлэг олдсон бөгөөд бичлэгийг цагдаагийн байгууллагад хуулж өгсөн гэдэг. Гэвч цагдаагийн байгууллага энэ талаар “Цагдаагийн хэсгээс ахалсан бүрэлдэхүүн очиж үзлэг хийхэд машин олон хоног байсан болохоор гадна талд шороо тоос болсон байсан. Талийгаачийн цогцсыг аймгийн Онцгой байдалтай хамтарч Хөвсгөл далайгаас гаргаж авсан. Үзлэгээр талийгаачийн автомашинаас хоёр ширхэг гар утас хурааж авсан. Одоо яригдаж байгаа бичлэгтэй байсан гар утас мөрдөн байцаалтын явцад хураагдсан. Гар утсанд үзлэг хийгээд, доторх мэдээллийг нь хуулж авсаны дараа ар гэрийнхэнд нь хүлээлгэн өгсөн” хэмээн мэдэгдсэн нь ямар учиртай вэ?
Мөн үүнээс гадна талийгаач Өмнөговь аймагт халдлагад өртөхөд цагдаагийнхан мотоцикльны мөрөөс өөр ямар ч мөр олдоогүй гэсэн. Ингэхдээ "Хүрэндаваа гэх даваагаар гарч ирэхэд үл таних маск зүүсэн хоёр залуу хутгалсан, цохисон. Би зугтаагаад 30 км газар явж ирлээ" гэж гэмтэл авчихсан ажил дээрээ ирсэн байдаг. Тухайн үед сумын хэсгийн төлөөлөгч уулзаж тайлбар мэдүүлэг авч, хэргийн газар үзлэг хийсэн байдаг. Ингэхдээ тухайн аймгийн мэргэжлийн хүмүүсийг оролцуулан үзлэг хийсэн бөгөөд мотоциклийн мөрнөөс өөр мөр олдоогүй гэсэн. Гэтэл хэрэг болсон өдрийн маргааш талийгаачийн аав Ж.Төмөрсүх Гурван тэс сумын цагдаа Бямбаа руу ярьж “Мөр олох, мөрдөн байцаалт явуулахад нь туслая” гэжээ. Гэвч таниар ажлаа заалгахгүй гэсээр хүлээж аваагүй байдаг.
Үүнээс гадна уул уурхайн компаниудтай тэмцэж байсан нь тогтоогдоогүй хэмээн мэдээлсэн. “Тост, Тосонбумбын нуруу нийтдээ 16 компанийн 21 лицензтэй аж ахуйн нэгжүүд үйл ажиллагаагаа явуулдаг. Тэнд талийгаач ямар нэгэн үйл ажиллагаа явуулаад, түүнийхээ төлөө ямар нэгэн төрийн бус байгууллагад элсээд явж байсан тохиолдол одоогоор тогтоогдоогүй байна. Тухайн лиценз эзэмшигч бүх компаниудиас эл хэрэгт холбогдуулан тайлбар мэдүүлэг авч байгаа” гэсэн. Гэвч энэ талаар аав нь цагдаагийн байгууллагад хангалттай мэдээлэл, баримт өгсөн. Түүгээр ч барахгүй тэнд Ж.Төмөрсүх үйл ажиллагаа явуулж буй компаниудын нууц бичлэгийг хүртэл өгчээ.
Яагаад чухам хэргийн талаар зөрүүтэй мэдээлэл өгч байгаа талаар иргэд өөр өөрсдийн байр суурийг илэрхийлсээр байна. Гэхдээ эх сурвалжийн талаар өнгөрсөн лхагва гаригт талийгаач Т.Лхагвасүмбэрэлийн аав Ж.Төмөрсүх Хууль зүйн яамны сайд Д.Дорлигжавтай уулзсан. Хэдийгээр Хууль зүйн яамнаас энэ талаар тодорхой мэдээлэл өгөхгүй байгаа ч талийгаач Т.Лхагвасүмбэрэлийн хэргийн талаар нухацтай авч үзэхээ Д.Дорлигжав илэрхийлжээ. Тиймээс цагдаагийнхан өөрсдийнхөө арьсыг хамгаалсан, энэ хэрэг дээр ажилласан гэдгээ харуулахын тулд шүүх шинжилгээний дүнг танилцуулсан байх магадлал өндөр гэдгийг хэлж байна.
