“Хангарьд” ордноор сүүлийн хэдэн өдөр сонин сайхан ихтэй байгаа бололтой. Хууль, хяналтын байгууллагынхан ирээд мэр сэр зарим нэг давхар, өрөөг битүүмжилж, эд хогшлыг нь аваад явсан сураг чих дэлсэв.
Тодруулбал, уржигдар буюу энэ сарын 18-ны өдөр “Хангарьд” ордны наймдугаар давхарт хууль хяналтын байгууллагын хүмүүс ирж ажилласан байна. Ингэхдээ наймдугаар давхарыг бараг л битүүмжилж бичиг баримт, эд зүйлсийг ачиж авч явжээ.
Чухам ямар учиртай ийм зүйл болсоныг зарим хүмүүс гайхаад өнгөрсөн байна.
Эх сурвалжийн мэдээллэсэнээр тус ордоны наймдугаар давхарт байрладаг Нийслэлийн нийтлэг үйлчилгээний албаны удирдах албан тушаалтнуудтай холбоотой авлигын хэргийг АТГ үйлдэл дээр нь барьсан сурагтай.
Нийслэлийн нийтлэг үйлчилгээний газар нь Нийслэлийн Засаг даргын хэрэгжүүлэгч агентлаг юм. Дотроо Захиргааны тасаг, Санхүү аж ахуйн алба, Үйлчилгээний болон Инженер техникийн гэсэн гурван албатай. Төрийн албан хаагчдын ая тухтай ажиллах нөхцөл байдлыг хангах чиг үүрэгтэй юм байна.
Тус газрын дарга Ш.Одончимэг, Санхүү, аж ахуйн албаны дарга бөгөөд ерөнхий нягтлан бодогч Д.Энхжаргал тэргүүтэй дөрвөн хүнийг АТГ саатуулаад байгаа юм байна.
Эдгээр албан тушаалтнуудыг өөрсдийн хамаарал бүхий “Үүлэн сондор”, “Үүлэн арвижих”, “Женерал дата”, “Найртын гол”, “Богадачахэ”, “Эко жолоо”, “Эко овоо” гэх зэрэг компанийн дансаар 100 гаруй үйлдлээр дээрх 1.5 тэрбум төгрөгийг шилжүүлэн авсан гэдэг үндэслэлээр буруутгажээ.
АТГ газар сүүлийн үед шалгалт хийнэ гэж “шууруулдаг” болжээ. Төрийн байгууллагуудад шалгалт явуулж гаргасан зөрчлүүд нь олон нийтэд мэдээлж байгаа. Мөн АТГ энэ талаар мэдээлэл өгөх боломжгүй, шалгагдаж байгаа гэсэн товч бөгөөд тодорхой бус хариулт өгчээ.