Хөдөлмөрийн үндэсний намын ээлжит бус их хурал өчигдөр болжээ. Тус хуралд 300 гаруй төлөөлөгч 21 аймаг, Улаанбаатар хотын дүүргүүдийн намын хороодыг төлөөлөн оролцсон байна. Намын ээлжит бус их хурлаар хариуцлагын ерөнхий хороог таван гишүүнтэйгээр, намын төв хороог дарга гишүүдийн хамтаар баталжээ. Мөн хурлын үеэр намын дарга С.Боргил намын даргын үүрэгт ажлаасаа чөлөөлөгдөх хүсэлт гаргасан байна. Тэрээр “Олон нийтэд илүү танигдсан, Хөдөлмөрийн үндэсний намыг сонгуульд авч орох туршлагатай, улс төрч намын даргын ажлыг хийх нь зүйтэй” гэсэн байна. Тэрээр хүсэлтээ ХҮН-ын ерөнхий нарийн бичгийн дарга Т.Доржхандад өгөөд төв хорооны гишүүдэд хандан намын даргад С.Ганбаатарыг санал болгосон аж. Мөн танхимаас намын Удирдах зөвлөлийн гишүүн Б.Найдалаа болон Удирдах зөвлөлийн гишүүн, Нийслэлийн намын хороон дарга Т.Бат-Оргил нарыг нэр дэвшүүлжээ. Харин Б.Найдалаа, Т.Бат-Оргил нар С.Боргилын саналыг дэмжин нэрээ татаж, санал хураалтаар УИХ-ын гишүүн С.Ганбаатар Хөдөлмөрийн үндэс намын даргаар 98 хувийн саналаар сонгогдсон байна.
С.Ганбаатар ХҮН-ын дарга болжээ
2016-01-18 11:21:00
