Монгол Улсын Ерөнхийлөгч Х.Баттулга Улсын Их Хурлын шийдвэрт өнгөрсөн долоо хоногт хэсэгчлэн хориг тавих тухай албан бичиг хүргүүлсэн. Уг албан бичигт “Өнгөрсөн жилүүдэд гучин гэр бүлийн хяналт дарангуйлалд байсан Монгол төрийн иргэдийнхээ элбэг хангалуун амьдрах хүсэл тэмүүллийг нэг удаагийн хавтгайруулж аргацаасан энэ мэт халамжийн бодлогоор удаа дараа дарж, өр зээлд ээрэгдсэн өнөөгийн түвшинд нь барьж ирсэн бодлогыг бүрэн халах цаг болсон гэж үзэж байна.Ерөнхийлөгч миний бие цаашид улсын төсөв, эдийн засгийг хямраан туйлдуулах зорилготой энэ мэт бодлогыг гүйцэлдүүлсэн хууль, Улсын Их Хурлын бусад шийдвэрт хориг тавих болно.Иймд Засгийн газрын гишүүн-Сангийн сайдаар Ч.Хүрэлбаатарыг томилсон Улсын Их Хурлын тогтоолын зохих хэсэгт тавьсан энэхүү хоригийг хууль, журмын дагуу хэлэлцэн шийдвэрлэж өгөхийг хүсье” гэсэн байсан.
Монголын баялагийг сорж шимж байгаа 30 гэр бүлийн талаар Монгол Улсын Ерөнхийлөгч Х.Баттулга ярьдаг. Ерөнхийлөгч хориг тавихдаа 30 гэр бүлийг дахин дурьдаж, өнгөрсөн долоо хоногийн сүүлээр Сангийн сайд Ч.Хүрэлбаатар үүнд багтдаг хэмээн хэллээ. Гэхдээ Ерөнхийлөгч нөгөө алдарт 30 гэр бүлийг мөн л зарласангүй, дахин дурьдаад өнгөрлөө. Гэхдээ энэ удаад 30 гэр бүлийн нэгийг нь зарлах шиг боллоо. Учир нь Сангийн сайдаар Ч.Хүрэлбаатарыг томилсон Улсын Их Хурлын тогтоолын зохих хэсэгт хориг тавихдаа яагаад 30 гэр бүлийн дурьдаж хориг тавив. Үүний шалтгааныг Ерөнхийлөгч хориг дотроо тодорхой бичсэн байна.
Энэ талаар Хууль зүйн байнгын хорооны дарга, УИХ-ын гишүүн Ш.Раднаасэд "Гучин гэр бүлийн нэрсийг нь хэлж өгөөч. Энэ дотор хэн, хэн нэг, хоёр, гурав гээд багтаж байна. Ч.Хүрэлбаатар сайд энэ 30-ийн яг хэдэд байна вэ. Үүнийг нэгдүгээрт мэдмээр байна. Хоёр дахь зүйл гэвэл “Батлагдаагүй асуудал дээр хориг тавина” гэсэн Ерөнхийлөгчийн заналхийлсэн байр суурь юм уу, хориг тавьж байгаа албан бичиг дээр орж ирсэн байна билээ. Хориг өөрөө нэгдүгээрт үндэслэлтэй явдаг. Өөрөө дагуулаад эрх зүйн үр дагавар үүсгэж байгаа.
Тэгээд энэ гаргасан үндэслэл, энэ бичгээс нь харж байхад их зовлонтой харагдаж байгаа. Гучин гэр бүлийн нэг гэдэг нь тогтоогдоод байх шиг байгаа юм. Далд санаатай, давхар бодолтой хориг байж болохгүй гэж би УИХ-ын гишүүний хувьд бодож байна" гэсэн юм. Харин Ерөнхийлөгчийн Тамгын газрын дарга З.Энхболд “Ашигт малтмалын газраас лиценз олгодог жагсаалтыг үзвэл харж болно. Хэн хамгийн их лицензтэй вэ гэдэг нь харагдана. Үндсэн хуулийн 6.1-дэх хэсэгт заасан ард түмний мэдэлд байдаг байгалийн баялгийг лиценз гэх цаасаар авсан хүмүүс байгаа юм. Энэ мэдээлэл бүгд ил тод байдаг” гэсэн хариу тайлбар өгсөн.
Өмнө нь Ерөнхийлөгч Х.Баттулга ярилцлага өгөхдөө мөн л монголын баялагийг сорж байгаа 30 гэр бүлийн тухай ярьсан байдаг. Гэтэл өнөөдөр Ерөнхийлөгч тухайн 30 гэр бүлийг дахин сөхөж ярив. Үнэхээр монголын баялагийг 30-хан гэр бүл сорж байгаа бол 30 гэр бүлийн нэрийг зарлаж, хуулийн байгууллагаар шалгуулах хэрэгтэй. Гэтэл Ерөнхийлөгч хэвлэлд ярилцлага өгөхдөө л дурьдаад өнгөрдөг. Үүний эсрэг нэг ч ажил хийсэнгүй.Эсвэл Ерөнхийлөгч Х.Баттулгад тухайн 30 гэр бүлийн нэрийг нэрлэж болохгүй шалтгаан байна уу. Ерөнхийлөгч болсоноосоо хойш баялаг сорж буй 30 гэр бүлийн талаар хамгийн их ярьсан мөртлөө нэг ч бодьтай ажил хийсэнгүй. Энэ асуудал яаж төгсөх бол гэдэг нь эрхгүй анхаарал татаж байна. Монгол төрийг “атгаж” буй энэ 30 гэр бүл хэн бэ.