Засгийн газрын өнгөрсөн долоо хоногийн хуралдаанаар ТЕГ-ын дарга Б.Хурцыг чөлөөлж БНСУ-д суух элчин сайдаар томилох саналыг өргөн барихаар болсон. Тэгвэл үүнийг эсэргүүцэж, УИХ-ын гишүүнд Ж.Батзандан мэдээлэл хийлээ. Тодруулбал, УИх-ын гишүүн Ж.Батзанданг Өргөдлийн байнгын хорооны даргаар ажиллаж байх хугацаанд ТЕГ-ын дарга асан Б.Хурцтай холбоотой маш олон өргөдлүүд ирж байсан аж. Тодруулбал,
Нэгдүгээрт, Д.Энхбат гэдэг залууг гадны орноос унтуулах тариа хийж авчран, шоронд зургаан сар хорьсон хүн бол Б.Хурц юм. Үүнийг дэлхий даяараа мэднэ. Тэр залуу зургаан сар хоригдоод амиа алдсан. Гэр бүлийн хүмүүс нь бидэнд маш их өргөдөл ирүүлсэн. Хууль бусаар хүн хулгайлсан хэргээр гадны шүүхийн байгууллагууд болох Герман, Англи, Европын холбоо Б.Хурцыг шалгаж байна. Тэр Европын холбоо руу орох эрхгүй болсон. Энэ хэргийг шалгах ёстой.Монгол Улсын жирийн иргэнийг тагнуулын байгууллагын хүн нь гаднаас хууль бусаар хулгайлан авчирдаг явдлыг таслан зогсоох ёстой.
Хоёрдугаарт, С.Зоригийн амь насыг хөнөөсөн хэргийг мөрдөн шалгаж, Улсын дээд шүүхээр оруулж улстөрийн захиалгатай аллага байна гэж үзээд гурван Монгол Улсын иргэнд ял өгөөд явуулсан.Гэтэл одоо болтол захиалагч нь олдохгүй байгаа. Өнөөдрийг хүртэл захиалгчыг нь хэлээгүй Энэ асуудлаар би ХЗДХ-ийн сайд Ц.Нямдоржтой олон удаа уулзсан. Асуудлыг тодорхой болгохгүй бол гурван хүнд ял тулгах замаар хэлмэгдүүллээ. Үүнийг УИХ-аар ил тод хэлэлцэх учиртай. Энэ бүхнийг УИХ-аар ил тод болгохоос нааш Б.Хурцыг гадагш нь элчингээр томилох нь буруу гэж би үзэж байна. Үүнийг ч шаардаж байна.
Гуравдугаарт, “Эрдэнэт” үйлдвэрийн 49 хувийг Худалдаа хөгжлийн банкинд авч өгөх ажиллагааг гардан зохион байгуулсан хүн бол алдарт тагнуулч Б.Хурц юм.Уг хувийг Засгийн газар дангаараа авах бүрэн боломжтой байсан. Гэтэл нууцаар худалдах ажлыг Б.Хурц, Ч.Сайханбилэг нар УИХ-д мэдэгдэлгүйгээр нууц зохион байгуулсан. Үүнийг бид УИХ-аар ярилцах учиртай. Энэ асуудлыг шийдэхээс нааш Б.Хурцыг элчин сайдаар яаран томилох хэрэггүй гэж би үзэж байна.
Дөрөвдүгээрт, Намайг Өргөдлийн байнгын хорооны даргаар ажиллаж байхад өөртэй нь хамт ажиллаж байсан Цогтбаатар гэдэг хүнийг тагнуулыг хилс хэрэгт хийсэн талаар Цогтбаатарын эхнэрээс нь өргөдөл ирж байсан.Энэ асуудлыг одоо болтол УИХ хэлэлцэхгүй дарж байгаа. Ер нь УИХ-ын гишүүд, бизнесменчүүд Б.Хурцаас маш их айдаг. Алийн болгон Б.Хурцаас айж амьдрах юм бэ. Насаараа айж амьдрах юм уу. Б.Хурцад газраа, тендерээ бизнесээ дээрэмдүүлсэн хүмүүс одоо УИХ-д өргөдлөө өг. УИХ-аар энэ асуудлыг нээлттэй сонсгол хийж,ярилцах цаг болсон" гэлээ.
