Энэ сарын 2-нд Дорноговь аймгийн Замын-Үүд сумын хоёрдугаар сургуулийн гуравдугаар ангийн сурагч найман настай охин сураггүй алга болоод тав хонож байна. Охиныг эрэн хайх ажиллагааг орон даяар зохион байгуулж байгаа юм. Одоогоор ямар нэгэн сэжүүр таамаг олдоогүй болохыг хууль хүчний байгууллага мэдээлж буй. Д.Сэржмядаг охин 130-150 метр өндөртэй, тухайн өдөр ягаан куртик, бор гутал, ягаан цүнх, сургуулийн дүрэмт хувцастайгаа гэрээсээ хичээлдээ явахаар гарсан ч сургууль дээрээ очоогүй байдаг. Хамгийн сүүлд охиныг хичээлдээ явахыг харсан нэг л хүн байгаа гэх мэдээлэл байгаа юм. Бид Д.Сэржмядаг охины аав Д.Дашдуламтай утсаар холбогдож дараах мэдээллийг авлаа.
-Сайн байна уу.Охиныг тань хичээлдээ явахыг нь харсан нэг хүн байгаа гэсэн. Тэр хүнтэй уулзсан уу?
-Уулзсан. Манай хөрш байгаа юм. Хичээл рүүгээ явахдаа тэдний гэрийн урдуур өнгөрдөг юм. Хичээлдээ явж байхыг нь харсан гэсэн. Тэр өдрөөс хойш сураггүй байна
-Охиноо хайж байхад ямар нэгэн сэжүүр таамаг олдсон болов уу?
-Олдоогүй. Цагдаа хууль хүчний байгууллагатай хамтраад хайж байна. Охиноо л олчих юмсан гэсэн бодол байна. Өөр юу ч бодогдохгүй байна.
-Тухайн өдөр цагдаагийн байгууллагад хэдэн цагийн үед дуудлага өгсөн бэ?
-Цагдаагийн байгууллагад оройны 16:30 цагт дуудлага өгсөн. Би ээжтэй нь цуг Шанд руу явчихаад харих замдаа эгч рүү нь залгаад хоёр дүүгээ авсан уу гэж асуутал уйлаад гэртээ ирээгүй байна гэж хэлсэн.
-Та хүүхдээ сургуульд нь хүргэж өгч, авдаг байсан уу?
-Янз бүр. Ажилтай үед өөрөө хичээлдээ явчихаад гэртээ ирдэг байсан. Завтай үедээ хичээлд нь хүргэж өгдөг байсан.Өдөр болгон гараас нь хөтлөөд хичээлд нь хүргэж өгдөггүй байсан минь үнэн.
-Хичээл нь орой хэдэн цагт тардаг байсан бэ?
Орой 17:10 цагт тардаг. Хичээлээ тарсан үедээ заавал ээж аав руугаа залгадаг байсан. Тухайн өдөр өдөрийн 11:40 цагт хичээлдээ явахаасаа өмнө залгасан. Гэвч ээжийнх нь утас унтарчихсан. Би өөрийнхөө утсаар залгатал холбогдох боломжгүй болчихсон байсан. Тухайн үедээ утасны цэнэг нь дуусчихсан юм байлгүй дээ гэхээс өөр бодол төрөөгүй.
-Охины талаарх янз бүрийн мэдээлэл гарч байгаа. Эрлийн ажиллагааг хаагуур үргэлжлүүлж байна?
-Ах нь өөрийнхөө хэмжээнд ах дүүс хамаатан садан найз нөхдийн хэмжээнд 50 гаруй хүмүүс хайж байна. Бас сайн дурын байгууллагынхан хамтарч байгаа. Гэр, байраар ихэвчлэн хайж байна. Замын-Үүдийг бүхэлд нь самнаж үзлээ. Хөдөө баруун хойшоо ч хайж байна.
