"Парадайз пейпэрс" хэмээн нэрлэгдсэн 150 гаруй улстөрчдийн оффшор дансны материалыг багтаасан “Диваажингийн баримт бичгүүд” шуугиан тарьж эхэллээ. "Парадайз пейпэрс"-ын мөрөөр 67 орны 400-аад сэтгүүлчид эрэн сурвалжилсан байна. Эрэн сурвалжлах сэтгүүлчдийн олон улсын консерциум (ICIJ)-аас дэлгэсэн нууц баримтад 50 орны 150 гаруй улс төрчид багтсан байна. Тус мэдээлэлд ОХУ-ын Ерөнхийлөгч В.Путинын хүргэнтэй холбогдох материал, Их Британийн Хатан хаан II Элизабетын нууц оффшорын талаар мэдээлэл орсон байна. Тус 120 гаруй улстөрчдийн оффшор дансны материалыг багтаасан 13.4 сая баримт бичиг дотор Монгол улсын нэг компани холбогдсон нь анхаарал татаж байна.
"Диваажингийн баримт бичгүүд" гэж нэрлэгдэж буй баримт мэдээлэл дотор Сингапурын бизнесмэн Лин Гоутой холбоотой баримт бичгүүд байгаа талаар хэвлэл мэдээллүүд дурьдсан байна. Хонконгийн эрэн сурвалжлах багийн мэдээлж байгаагаар Хятадын нэрт жүжигчин буюу бидний мэдэх "Хуанжу Гэг" кинон гол дүрийн жүжигчин Жао Вэйнгийн нөхөр Хуанг Юолонг нь оффшор компаниар дамжуулан Монгол дахь компанид 70 гаруй сая долларын хөрөнгийг 2011 онд оруулжээ. Хуанг Юолонгийн хөрөнгө оруулсан Монголын компани нь “Мизү” ХХК аж. “Мизү” ХХК нь “Монгол туургатны зуун эрхэм” нэвтрүүлгийн продюссер асан П.Анужингийн экс нөхөр гэдгийг хүмүүс сайн мэднэ. .
Монгол туургатны зуун эрхэм” нэвтрүүлгийн продюссер асан П.Анужингийн экс нөхөр Амалхааны Эрдэнэбат хоёр жилийн өмнө Ерөнхийлөгчийн зөвлөх Асашёрюү Д.Дагвадоржтой “Мизу” компанийн хувь эзэмшил болон 10 сая ам долларын асуудлаар шүүхдэлцэж байгаа талаараа хэвлэлийн бага хурал хийж байсан. Тухайн үед А.Эрдэнэбат “Миний бие одоогоос хэдэн жилийн өмнө Монгол түмний хайр хүндэтгэлийн хүлээсэн сүмогийн их аварга Д.Дагвадорж, УИХ-ын гишүүн Д.Сумьяабазар, Үндэсний хөрөнгө оруулалтын банкны ТУЗ-ийн дарга Б.Баярсайхан нартай холбогдож, тэд манай төслүүд дээр нэмэлт хөрөнгө оруулалт хийх, хөрөнгө оруулагчдыг надад танилцуулсан. Тэрхүү хөрөнгө оруулагч нь БНХАУ-ын иргэн Хуан Ёу Лун буюу та бид түүний гэргий нь Хятадын алдарт жүжигчин Жао Вэй буюу “Хуан Жу Гэг” нэрээр мэдэх байх. Бидний хэрэгжүүлж байсан төсөл дээр нэмэлт хөрөнгө оруулалт хийхээр Хуан Ёу Лун Эрдэнэбат миний нэр дээр 10 сая долларын зээлийн гэрээ хийсэн. Уг мөнгийг Д.Дагвадоржийн банк болох ҮХОБ-аар дамжуулан оруулж ирсэн ч мөнгө бүтнээрээ Д.Дагвадоржийн хувийн данс руу шилжсэн байдаг юм. Өөрөөр хэлбэл, захиран зарцуулалтыг Д.Дагвадорж хийсэн байдаг. Зээлийн гэрээг миний нэр дээр хийсэн ч миний бие ганц ч долларыг захиран зарцуулаагүй. Энэ хэргийг хууль хяналтын байгууллагаар шалгуулж байгаа” хэмээн хэвлэлийн бага хурал хийж байсан.
Хуан Юолонгийн хөрөнгө оруулсан Монголын “Мизү” компани цементийн үйлдвэр эрхэлдэг. Ман ашигт малтмал тусгай зөвшөөрөл эзэмшдэг аж.
Амалхааны Эрдэнэбатын хувьд 2004 онд “Лайв Энержи Групп”-ыг үүсгэн байгуулж уул уурхайн бизнест хөл тавьсан бөгөөд 2005 онд “Шинэ шивээ” компаниа байгуулж байсан гэдэг. Тус компанийн охин компани болох “Мизу” компани нь Дорноговь аймгийн Айраг сумын нутаг дахь шохой чулууны орд газарт олборлолт хийж байсан.
Амалхааны Эрдэнэбатад Хуанг Юолонгийн оффшор компаниар дамжуулан өгсөн 70 гаруй сая доллар нь УИХ-ын гишүүн Д.Сумьяабазар, их аварга Д.Дагвадорж нарын эзэмшлийн Үндэсний хөрөнгө оруулалтын банкаар дамжиж, мөн дундаас Их аварга Д.Дагвадорж авсан гэдэг мэдээлэл өгч шүүхдэж байсан ч өнөөдрийг хүртэл чимээгүй байна. Ямартай ч "Диваажингийн баримт бичгүүд” дотор "Хуанжу Гэг" киноны гол дүрийн жүжигчин Жао Вэйнгийн нөхөр Хуанг Юолонг нь оффшор компаниар нь дамжуулан хөрөнгө оруулалт авсан Монголын "Мизү" ХХК-ы нэр дуулдаж эхэллээ.
