(2017-10-26) Тагнуулын ерөнхий газрын дарга асан Б.Хурц хэвлэлийн бага хурал хийсэн. Тэрбээр хэвлэлийн бага хурлаа шууд ХЗДХ-ийн сайд Ц.Нямдоржтой холбоотой мэдээлэл хийсэн. Ц.Нямдорж сайд болохоороо ТЕГ-аар оролддог. Энэ хүн өөрөө хууль зөрчдөг. Ц.Нямдорж гэдэг хүн Н.Алтанхуяг, Д.Дорлигжав гэсэн машруттай бүлэглэлд байдаг. Энэ бүлэглэл бол хүчтэй. Энэ бүлэглэл өөрсдөө Эрдэнэттэй холбоотой, маш их бизнес шахаа хийдэг. Мөнгөтэй, санхүүтэй, хэвлэлтэй, сайттай. Бидэнд байгаа мэдээллээр, Эрдэнэтийн захирлыг "Хаан жимс" дуудаж, энэ гэрээг үргэлжлүүл гэж шахсан байгаа юм. Гэрээ нь юу вэ гэхээр, III цахилгаан станцын гүйцэтгэх захирал С.Анхбаяраар дамжуулж, 42 сая долларын бараа материал шахсан" гэсэн мэдээллийг өгсөн.
Үүний дараа ХЗДХ-ийн сайд Ц.Нямдорж мэдээлэл хийж, хуулийн хүчний байгууллагын дарга нарыг нэг цагийн дотор хална хэмээн мэдэгдэл хийсэн. Үүнийгээ ч баталж, нэг цагийн дотор Засгийн газрын хуралдаанаар ЦЕГ-ын даргыг халж орны хүнийг томилж эхэлсэн. Ингээд ТЕГ-ын дарга асан Б.Хурцыг ч мөн халсан. Гэхдээ Б.Хурц ор хоосонгүй. Засгийн газар Б.Хурцыг Тагнуулын ерөнхий газрын даргын үүрэгт ажлаас нь чөлөөлсөн ч Монгол Улсаас БНСУ-д суух Элчин сайдаар томилуулах саналыг оруулж ирсэн. УИХ харин томилох эсэхээ шийдэхийн тулд өчигдөр Аюулгүй байдал, гадаад бодлогын байнгын хорооны хуралдаанаар хэлэлцэв. Байнгын хорооны хуралдаанд оролцсон гишүүдийн 78,6 хувь нь Б.Хурцыг БНСУ-д суух Элчин сайдаар томилохыг дэмжиж, УИХ-ын чуулганаар эцэслэхээр болсон.
УИХ-ын Аюулгүй байдал, байнгын хорооны хуралдаан өчигдөр үдээс хойш эхэлсэн бөгөөд гишүүн болсоноосоо хойш төрийн ордонд харагдахгүй байсан Б.Наранхүү гишүүн хүртэл ирсэн байсан нь олны анхаарлыг татлаа. Б.Хурцыг БНСУ-д суух Элчин сайдаар томилох асуудал энэ сарын 01-ээс эхлэн яригдаж эхэлсэн. Яригдаж эхлээд удаагүй байна. Гэтэл таван элчин сайд итгэмжлэх жуух бичгээ хүлээгээд сууж байна. Тодруулбал, Япон Улсад суух Элчин сайд Тэнгэрийг Япон улс зөвшөөрчихөөд байхад асуудал нь 130 хоног хүлээгдэж байна. Мөн Канадад суух элчин сайд Н.Чимгүүндарь 117 хоног хүлээж байна. АНУ-д элчин сайдаар суух Ё.Отгонбаяр 175 хоног итгэмжлэх жуух бичгээ хүлээж байна. Эдгээр хүмүүсийн асуудлыг шийдээгүй байж, УИХ-ын Аюулгүй байдал, байнгын хорооны хуралдаанаар Б.Хурцын асуудлыг хэлэлцлээ. Асуудлыг хэлэлцэх үеэр Б.Хурцаас УИХ-ын гишүүдээс зоригтой ганц асуулт асуучих гишүүн олдсонгүй. Ингээд БНСУ-д суух Элчин сайдад нэр дэвшигч Б.Хурцаас хэн ямар асуулт асуусан ямар хариулт өгсөнийг хүргэж байна.
УИХ-ын гишүүн О.Баасанхүү:
-АТГ-ын дарга Х.Энхжаргал хэний цэрэг вэ?Ерөнхий прокурор Энх-Амгалан хэний хяналт, шийдвэрээр ажилладаг вэ? Дамирангийн Энхбатыг алсан юм уу? Хүний аминд хүрсэн юм уу? Та үүнд тайлбар өгнө үү?.
Нэр дэвшигч Б.ХУРЦ:
-Миний өмнө эрхэлж байсан ажилтай холбоотой асуулт их асууж байна. Таны асууж байгаа хүмүүс бүгд хуулийн дагуу, ажил үүргээ гүйцэтгэж байгаа. Зарим асуудлаар нээлттэй хэлэх боломжгүй.
-УИХ-ын гишүүн Б.Энх-Амгалан:
-Солонгосын хойг олон улсын анхаарлын төвд байгаа. Бүс нутгийнхаа нөхцөл байдлыг нэр дэвшигч юу гэж үзэж байна. БНСУ-д манай иргэд олноор байгаа. Тэдний асуудлыг хэрхэн шийдэх гэж байна.
Нэр дэвшигч Б.Хурц:
-Солонгост манай 40-өөд мянган иргэд байна. Тэдний аюулгүй байдал тусгай чиг үүргээр хангагдана гэж ойлгож байна.
-УИХ-ын гишүүн Л.Болд:
- Ц.Нямдорж та хоёр ноцтой баримтууд нэгнийхээ өмнөөс шидсэн. Энэ бодитой юу. Надтай хамт ажиллаж байсан хоёр ТНБД-ын дарга шалгагдаж байгаад амиа алдсан. Хохирлыг нь нөхөн төлсөн ч хэн ч ар гэрээс нь уучлал гуйгаагүй. Хөл нь өвдөж байгаа өвчтэй хүнийг хоёр давхрын шат өөд чирж гулдарч аваачаад, тагнуулынхан байцаалт авсан. Маш хүнлэг бус үйлдэл.
-Нэр дэвшигч Б.Хурц:
Л.Болд гишүүн Батлан хамгаалахын сайдаар ажиллаж байхдаа Хойд Солонгосоос зэвсэг авах асуудал яригдсан. АТГ ч шалгаж байсан. Хойт Солонгост танаас болж хоёр хүн хүн цаазлуулсан. Та шударга хүн мөн үү. Би цааш нь ярих уу. Би хариулчих юм уу, гишүүд ээ айн?. Манай мөрдөн шалгах хэлтэс нэг давхарт ажилладаг. Тэдгээр залуусаа би одоо ч өмгөөлнө. Хэт хувийн зүйл ярьсанд уучлаарай. Та Хойд Солонгост 300 мянган ам.доллар төлөх естой шүү. Л.Болд БХ-ын сайдаар ажиллаж байхдаа Хойд Солонгост 300.000 ам.доллараар зэвсэг зарсан. Таны найзын компани Батлан хамгаалах яамны хэд хэдэн барилга, байгууламж барих тендерт шалгарсан асуудлаар шалгагдаж байсан. Өөр зүйлс ч байна. Би ярих уу, яах уу...?
-УИХ-ын гишүүн Л.Болд:
-“Улаан цайм ингэж гүтгэдэг байхгүй юу. Надад ийм зүйл байхгүй гэдгийг тогтоочихсон учраас би энд сууж байна. Харин одоо сая хэлсэн үгээр чинь хууль, шүүхийн байгууллагаар явна шүү.Сая Ц.Нямдорж сайдыг бас 42 сая ам.доллар гээд гүтгэсэн. Шүүмжилсэний төлөө улаан цайм хүний нэр төрд халдаж байна. Хуулийн байгууллагаар явна шүү.
МАН-ынхан Б.Хурцаас уучлалт гуй
УИХ-ын гишүүн Ж.Батзандан
Хувийн болон улсын нууцтай асуудлыг хаалттай явуулдаг. МАН-ын гишүүд сөрөг хүчин байхдаа хууль хяналт, тагнуул, АТГ дарамтлаад байна гэдэг байсан. Энэ ярьж байсан зүйл чинь худлаа байсан бол Б.Хурцаас уучлалт гуй. Монголын төр Д.Энхбатын гэр бүлээс уучлалт гуйх ёстой. Хурц та даалгавар биелүүлсэнийг ойлгож байна.
Өмнөд Солонгост Элчин сайдаар томилогдох Б.Хурцтай холбоотойгоор УИХ-д өргөдөл гомдлууд байгаа. Д.Энхбатын гэр бүлээс ирсэн өргөдөл байна. Цогтбаатар гэдэг хүний эхнэрээс ирсэн өргөдөл байгаа.Мөн С.Зоригийн аллагатай холбоотой хэрэг хоёр долоо хоногийн дараа ил болох гэж байна. Энэ хэргийг мөрдөн шалгасан байгууллага нь Тагнуулын Ерөнхий Газрын мөрдөн байцаагчид байсан. Уг хэргийг ил болохыг хүлээх шаардлагатай байна. Эрдэнэтийн 49 хувийн асуудал Үндсэн хуулийн цэц дээр өнөө маргаашгүй шийдэгдэх гэж байгаа. Тэгэхээр нийтийн сонсгол, томилгооны сонсголыг 19 гишүүн санал гаргасан тохиолдолд хийдэг. Б.Хурцыг Элчин сайдаар томилохтой холбоотой томилгооны сонсгол хийе гэж УИХ-ын 21 гишүүн санал гаргасан. Тиймээс эдгээр гишүүний саналд хүндэтгэлтэй хандаач гэж хэлмээр байна.
УИХ-ын Т.Аюурсайхан
-Үнэн худал нь мэдэгдэхгүй тагнасан чагнасан асуудал их яригдаж байна. Хуулийн байгууллага тагнуул хийж байна. Үүнийгээ зогсоох хэрэгтэй.
УИХ-ын гишүүн Н.Энхболд
-Монголын төр гадаад бодлого цаашаа нэг цонхоор байх уу. Яагаад томилогдсон элчин сайдууд итгэмжлэх жуух бичгээ барихгүй байна вэ.
ХЭЛ АМ БОЛЖ БАЙГАА ИЙМ ХҮНИЙГ ЭЛЧИН САЙДАД ДЭВШҮҮЛЭХ ЯМАР ШААРДЛАГА БАЙНА ВЭ?
Аюулгүй байдал байнгын хорооны дарга О.Содбилэг
-Энэ асуудал дагуулсан нэр дэвшигчийг заавал оруулж ирэх хэрэг байсан уу. Яагаад энэ нэр дэвшигчийг сонгосон бэ. Хэл ам болж байгаа ийм хүнийг нэр дэвшүүлэх ямар шаардлага байгаа юм бэ? Монгол Улсыг төлөөлж Солонгос улсад суух элчин сайдад өөр боловсон хүчин яригдсан уу?.
Гадаад харилцааны сайд Д.Цогтбаатар
Элчин сайдын асуудал зохих бүх түвшинд яригдаж байж шийдэгддэг. Засгийн газарт орохын өмнө зайлшгүй хийгдэх бүх процедураа хийгээд уг асуудлыг оруулж байгаа.Элчин сайдын тухайд гэвэл өмнө нь Монголын дипломат албанд ажиллаж байсан. Тухайлбал Унгар, Туркэд ажилласан хүн.Гадаад бодлого, батлан хамгаалах, тагнуул гурвын үйл ажиллагаа их олон зүйл дээр давхацдаг. Тэгэхээр бидэнтэй Б.Хурц аюулгүй байдлын асуудлаар байнга зөвлөлдөж байдаг, Элчин сайдаар ажиллах боломжтой хүн
Ерөнхийлөгчийн гадаад бодлогын зөвлөх н.Тэгшжаргал
Нэр дэвшигчийг судалж боломжтой гэж үзээд оруулж ирсэн.
Ийм асуултуудыг БНСУ-д суух Элчин сайдад нэр дэвшигч Б.Хурцаас гишүүд асуулаа. Дорвитой ганц ч асуулт асуучих гишүүн байсангүй. Б.хурц УИХ-ын гишүүн Л.Болдыг "Хойд Солонгост танаас болж хоёр хүн хүн цаазлуулсан. Та шударга хүн мөн үү. Би цааш нь ярих уу. Би хариулчих юм уу, гишүүд ээ айн?.Хариулъя тэгэх үү гишүүдээ" гэж хэлэхэд бүх гишүүд дуугаа хурааж, танхим нам гүм болсон. Үүнээс цааш яривал УИХ-ын бүх гишүүдийн но-г Б.Хурц дэлгэх нь гэсэн багахан айдаст автсан гишүүд олигтой ч асуулт асууж чадсангүй.