Өнгөрсөн долоо хоногийн УИХ-ын чуулганы хуралдаанаар Солонгос улсад Элчин сайдаар суух Б.Хурцын томилгооны асуудлыг хэлэлцсэн. Уг асуудлыг УИХ-аар хэлэлцэхээс өмнө УИХ-ын гишүүн Ж.Батзандан “Томилгооны сонсгол” явуулах санал санаачилга гаргасан юм. Нэр бүхий 21 гишүүний гаргасан хүсэлтийн дагуу Томилгооны сонсгол зохион байгуулах нь зүйтэй гэж үзсэн. Тус томилгооны асуудлаас үүдэж хувь хүн болон төрийн нууцтай холбоотой маш ноцтой асуудлууд нэлээд яригдсан. “Томилгооны сонсгол”-той холбоотойгоор өнгөрсөн долоо хоногт АН-ын бүлгийн дарга Д.Эрдэнэбатын өрөөнд ТЕГ-ын газрын дарга асан Б.Хурц “Ж.Батзандан аятайхан байгаарай, үгүй бол орон дотор чинь хүнээр хорлуулж, алж чадна шүү” хэмээн заналхийлсэн талаар мэдээлэл цацагдаж байсан. Улмаар УИХ-ын гишүүн Ж.Батзандан төрийн хамгаалалтанд оруулж өгөхийг хүссэн.
Тэгвэл энэ асуудлаар АН-ын бүлгийн дарга Д.Эрдэнэбат гэрчийн мэдүүлэг өгчээ.Энэ талаар тэрбээр “Сүүлийн үед олон нийтийн анхаарлын төвд байна. Миний өрөөнд болсон асуудлаар хууль хяналтын байгууллагад шалгагдаж байгаа. Гэрчийн мэдүүлэг надаас авсан. Одоо нийгэмд элдэв янзын асуудлаар ярих хэрэггүй” гэсэн байна. Харин УИХ-ын гишүүн Ж.Батзандан Б.Хурцын асуудлаар “Б.Хурцыг өмнөд Солонгост Элчин сайдаар томилох талаар нийтийн сонсгол хийх талаар 21 гишүүн гарын үсэг зурж, өргөн барьсан. ТЕГ-ын дарга асан Б.Хурц Бүлгийн дарга Д.Эрдэнэбатын өрөөнд болсон явдлын талаар гүтгэсэн.Би хуульч хүн, миний амнаас “ална” гэдэг үг гарч байгаагүй. Ардчилсан намын бүлгийн дарга Д.Эрдэнэбат “Б.Хурцтай эвлэр гэж Л.Болд бид хоёрт тулгасан. Дараа нь бүлгийн дарга Д.Эрдэнэбат Б.Хурц хоёр цагдаа дээр мэдүүлгээ нэгтгэсэн. Ер нь Д.Эрдэнэбат бүлэглэлийн гишүүн болсон гэдэг нь харагдаж байна. Энэ тухай би бүлгийн хурал дээр ярьсан. Цаашид бүлгийн дарга байх уу, бүлэглэлийн гишүүн байх уу гэдгээ шийдэх ёстой” хэмээн хэлсэн.
