С.Зоригийн хэргийн 14926 хуудас материалыг нууцаас гаргана

 

С.Зоригийн хэргийн материалыг  ТЕГ-ын дарга Д.Гэрэл танилцуулахаар боллоо

Засгийн газрын хуралдаанаар өчигдөр 14 асуудал хэлэлцэхээр товлогдсоноос олны анхаарлыг татсан сэдэв нь төр нийгмийн зүтгэлтэн С.Зоригийн хэргийг төрийн нууцаас гаргах эсэх асуудлыг хэлэлцэх байлаа. Засгийн газрын ээлжит хуралдаанаар С.Зоригийн хэргийн материалыг нууцаас гаргах асуудлыг  Тагнуулын ерөнхий газрын Мөрдөн байцаах хэлтсийн дарга н.Бархасбадь тэргүүтэй тагнуул, прокурорын төлөөлөгчид Засгийн газрын гишүүдэд танилцуулахаар Төрийн ордон хүрэлцэн ирж, мэдээлэл өглөө. Уг асуудлыг хэлэлцсэний дараагаар ХЗДХ-ийн сайд Ц.Нямдорж С.Зоригийн хэргийг төрийн нууцаас гаргасан эсэх талаар мэдээлэл хийхээр байсан. Гэтэл Засгийн газар нэгдсэн шийдэлд хүрч чадаагүй бөгөөд 19.20 минутын үед мэдээлэл хийнэ гэж байсан Ц.Нямдорж  Төрийн тусгай хамгаалалтынхнаар дамжуулан “Наад сэтгүүлчдээ тараа” гэсэн мэдээллийг өгсөн. Мөн үүнээс гадна ХЗДХ-ийн сайд Ц.Нямдорж “Өнөөдөр шийдвэр гарахгүй. Нууцын зэрэглэлтэй материалаар мэдээлэл өгөхгүй” гэсэн товчхон хариултыг өглөө. Хуралдаанаар С. Зоригийн хэргийг нууцаас гаргах эсэх асуудлыг хэлэлцэх үеэр уг хэрэгтэй холбоотой 15 мянган хуудас материал байдаг. Үүний 14926 хуудас материалыг нууцаас гаргана гэсэн мэдээлэл ил болсон.  Харин үлдсэн 74 хуудас материал нь захиалагчтай холбоотой мэдээлэл учраас нууцын зэрэглэлд үлдээнэ гэж эх сурвалж мэдээлсэн.

Мөн үүнээс гадна өчигдөр С.Зоригийн хэргийн материалыг нууцаас гаргах асуудлыг хэлэлцэх үеэр тус хэргийг Тагнуулын Ерөнхий газрын Мөрдөн байцаах хэлтсийн дарга н.Бархасбадь танилцуулсан. Гэвч хуулиараа бол С.Зоригийн хэргийн материалыг Тагнуулын Ерөнхий Газрын дарга Д.Гэрэл танилцуулах ёстой аж. Иймээс хуулийн дагуу ирэх долоо хоногт С.Зоригийн хэргийн материалыг  ТЕГ-ын дарга Д.Гэрэл танилцуулахаар боллоо.