Нийслэлийн прокурорын газрын Ял эдлүүлэх ажиллагаанд хяналт тавих хэлтсээс Шүүхийн шийдвэр гүйцэтгэх ерөнхий газрын харьяа хорих ангиудын "Хорих ял эдлүүлэх ажиллагаа Монгол Улсын нэгдэн орсон Олон улсын гэрээгээр тогтоосон стандарт, шаардлага болон хуульд заасан нөхцөл, дэглэмд нийцэж буй эсэх”-ийг шалгасан байна.
Шалгалтаар хорих ангиудад ял эдэлж буй хоригдлуудад Монгол Улсын нэгдэн орсон Олон улсын гэрээ, конвенц болон хууль тогтоомжид заасан хоригдлын эрхийг хангах талаар тодорхой дэс дараатай арга хэмжээг авч хэрэгжүүлж байх боловч зарим хорих ангид, тухайлбал Хорих 409 дүгээр ангийн нийгмийн ажилтнууд нь хоригдол бүрт хүрч ажиллахгүй, тэдгээрт шинэчлэн батлагдсан хуульд заагдсан хоригдлын эрхийг тайлбарлаж ойлгуулах ажил хангалтгүй байсныг илрүүлжээ.
Мөн эргэлт, уулзалтыг хууль, журамд заасны дагуу зохион байгуулдаггүй, байрлах байрны дулаан нь стандарт нөхцөлд заасан хэмжээнд хүрэхгүй, хоригдлуудыг бичиг баримтжуулах ажлыг шаардлагын хэмжээнд хийгээгүй зэрэг зөрчлүүд илэрчээ. Шалгалтын дүнг Нийслэлийн прокурорын газрын ерөнхий прокурорын дэргэдэх Зөвлөлийн хуралдаанаар хэлэлцэж, зөрчил илэрсэн хорих ангид прокурорын шаардлага хүргүүлэхээр шийдвэрлэсэн байна.
