Монгол Улсын Хөдөлмөрийн баатар, Төрийн шагналт, Ардын уран зохиолч, яруу найрагч Бавуугийн Лхагвасүрэнг "Ходоодны хорт хавдартай" гэсэн оношийг БНСУ-ын эмнэлэг гаргасан. Тэрбээр ирэх сарын эхээр хагалгаанд орох болсон бөгөөд 100 гаруй сая төгрөг шаардлагатай байгаа юм. Тиймээс ч түүнд сайхан сэтгэлт ард түмэн тусалсаар байгаа юм.
Энэ талаар эрхэм найрагч маань дараах тайлбарыг хийлээ.
Миний тайлбар: Биеийн эрүүл мэнддээ бага анхаарсны харгайгаар өвчнөө нилээд газар авахуулж арга буюу эмчлүүлэх шаардлагатай боллоо. Эмчлүүлэхэд бага биш зардал, төлбөр орох болсон тул өөрийн эх орон, элэг нэгт ахан дүүгээсээ хандив цуглуулахаас аргагүйд хүрсээн...
Ард түмэн, засаг төр минь анзааран дуулиантай хоногуудыг өнгөрөөж байна... өчүүхэн намайг ихэд хүндэлсэнд, сэтгэл тавьсанд баярлаж ханашгүй ээ.
Хамгийн түрүүнд “Алтан жолоо” грүпп 10.000.000 төгрөг өгөв. Засгийн газар анхаарал хандуулан нөөцөөсөө 10.000.000 төгрөг өгөх шийдвэр гаргажээ. БСШУ-ны яам 10.000.000 төгрөг, эрүүл мэндийн яам 5.000.000 төгрөг, Гацуурт кампани 10.000.000 төгрөг өглөө. Одоогоор надад ийм хандив цуглаад байна.
Танил дотно хүмүүс, ахан дүүс, чадал чинээгээрээ харамгүй тусалж номыг минь хүртэл борлуулалцаж өгч байна... Авах өгөхөөсөө илүүтэйгээр би Монголчуудынхаа сайхан сэтгэл, хайр хүндэтгэлийг илүү мэдэрч байна.
Монгол улсын ерөнхийлөгч Х.Баттулга тусална гэсэн. Х.Баттулгыг ерөнхийлөгч болохоос өмнө “Женко грүпп”-д олон өвчтэй, зовлонтой хүмүүс хандаж, мөн ч олон хүн баярлаж, зовлонгоосоо салж байсныг мэднэ би.... Тоон үзүүлэлт хэлвэл мөн ч олон тоо гарна даа. Хүмүүс өвчин зовлонд өртөхөөрөө “Женко грүпп”-ийн утсыг л сурдаг байсан даа. Ямар ч байсан Баттулгад хүн чанар, мөн чанар нь давуу өгөгдөлтэйг мэдэрсэн билээ...
Өвчин зовлонд үзэл бодол, намын харъяалал байдаггүй болохоор элдвийн яриа хөөрөөгүй зовлон жаргалаа дундаа дамжилж хүн ёсоор амьдарцгаах юмсан даа. Өгсөн авсныгаа нуух хаах илүү хүсэл сэтгэл надад үгүй ээ.