УИХ-ын чуулганы өнөөдрийн үдээс өмнөх нэгдсэн хуралдаанаар Төв банк /Монголбанк/-ны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслийн анхны хэлэлцүүлгийг хийлээ.
Эдийн засгийн байнгын хорооны санал, дүгнэлтийг УИХ-ын гишүүн Б.Баттөмөр танилцууллаа.Байнгын хорооны санал, дүгнэлттэй холбогдуулан УИХ-ын гишүүд асуулт асууж, хариулт авсан юм.
Тухайлбал УИХ-ын гишүүн Ц.Даваасүрэн, 1435 төгрөгтэй тэнцэж байсан ам.долларын ханш 2400 болж өссөнөөс, импортоор авч буй бараа бүтээгдэхүүний үнэ 70 хувиар нэмэгдсэн. Үүнээс болж ард түмний амьдрал хүндрэн, ядуурал бий болсон. Энэ бол Төв банкны бодлогын алдаа байсан. Төв банкны өмнөх ерөнхийлөгч нууц тушаал гаргаж, аж ахуйн нэгжүүдэд зээл олгосон. Долларын ханшийг өсгөн гадны хөрөнгө оруулагчдад үйлчилсэн гэж хэллээ. Тиймээс Монголбанкны ерөнхийлөгч дураараа шийдвэр гаргадаг явдлыг хязгаарлах ёстой гээд төв банкны ерөнхийлөгч, дэд ерөнхийлөгчтэй хариуцлага тогтолцоог хэрхэн тусгасан талаар тодруулав.
Мөн УИХ-ын гишүүн Ц.Нямдорж, Монголбанк аж ахуйн нэгжүүдэд зургаан хувийн хүүтэй зээл олгодог байсан хэмээгээд түүнийг хатуу хориглосон заалт оруулсан уу, Монголбанк сонгууль дөхөөд ирэхээр улстөрийн үйл ажиллагаа явуулж мөнгө цацдаг явдлыг таслан зогсоох заалт орсон уу гэж асуусан.
Эдийн засгийн байнгын хорооны дарга Д.Дамба-Очир, өнгөрсөн жилүүдэд гарсан замбараагүй байдлыг цэгцлэн, эдийн засгийн хямралд хөтөлдөг асуудлыг гаргахгүйн үүднээс Монголбанкны ерөнхийлөгчийн ганцаараа нууцлалын зэрэгтэй шийдвэр гаргадаг явдлыг хязгаарлахаар хуулийн төсөлд тусгаад байгаа гэлээ. Монголбанкинд хуучин байсан Хяналтын зөвлөлөөс гадна Мөнгөний бодлогын зөвлөл ажиллаж, аливаа асуудлаар хамтын шийдвэр гаргаж байхаар төсөлд тусгаж, төв банкны ерөнхийлөгчийн эрх мэдлийг хумьсан аж.
Түүнчлэн Монголбанкны ерөнхийлөгч, дэд ерөнхийлөгчийн хүлээх хариуцлагын талаар тусгаж, арилжааны банкинд зээл олгодог байсныг хааж, зөвхөн Засгийн газар, арилжааны банкинд зээл олгодог байхаар тусгажээ. Ингэснээр Монголбанк өөр хэлбэрээр зээл олгохыг хориглосон хэмээн Эдийн засгийн байнгын хорооны дарга Д.Дамба-Очир хариуллаа.
Хэлэлцэж буй асуудалтай холбогдуулан гишүүд асуулт асууж, байр сууриа илэрхийлсний дараа зарчмын зөрүүтэй саналын томьёоллуудаар санал хураалт явуулж дуусан хуулийн төслүүдийг эцсийн хэлэлцүүлэгт бэлтгүүлэхээр Эдийн засгийн байнгын хороонд шилжүүлэв.
