УИХ дахь МАН-ын бүлэг Ч.Сайханбилэгийг огцоруулах асуудлаар өнгөрсөн долоо хоногт завсарлага авсан билээ. Тэгвэл өчигдөр тус намын бүлэг хуралдаад, Ерөнхий сайд Ч.Сайханбилэгийг огцруулах саналыг 100 хувь дэмжихээр шийдсэнээ илэрхийлсэн. Мөн энэ үеэр УИХ-ын дарга З.Энхболдыг өөрийн саналаар огцрох ёстой гэсэн шаардлагыг энэ долоо хоногтоо багтаан хүргүүлэхээр болсноо мэдэгдсэн. УИХ дахь МАН-ын бүлгийн дэд дарга Д.Хаянхярваа энэ тухай “УИХ-ын дарга З.Энхболд чуулганы индэр ашиглан эрх, мэдлээ хэтрүүлэн ашиглаж байгаа.
Тухайлбал, хуулийн төслүүдийг ялгаварлаж хэлэлцдэг мөн дэгийн хуулиар завсарлага өгдөггүй, гишүүдийн үг хэлэх эрхэнд халддаг, тэднийг элдвээр доромжилдог өөрт нь таалагдсан хуулийн төслийг хүлээж авдаг таалагдаагүйгээ хүлээж авдаггүй гэх мэт УИХ-ын даргад байж болохгүй ёс зүйгүй авирыг гаргаж байна. Тиймээс УИХ-д өөрийн саналаар огцрох ёстой гэсэн албан ёсны шаардлагыг хүргүүлж байгаа. Тухайлбал, Төрийн байгуулалтын байнгын хорооны хуралдааны ирц бүрдэхгүй байхад онгоцонд явж байгаа Н.Батцэрэг сайдыг байнгын хорооноос чөлөөлж оронд нь Г.Батхүү гишүүнийг оруулж хүч түрж асуудлыг шийдэх гэсэн.
Энэ мэт хууль зөрчсөн үйлдлийг олноор гаргасан” гэсэн юм. Эх сурвалжуудын өгүүлж буйгаар Ерөнхий сайд Ч.Сайханбилэгийг огцруулах эсэх асуудлыг сунжруулан, УИХ-ын албан ёсны шийдвэр гаргах бөгөөд үүний дараа мөн л УИХ дахь МАН-ын гишүүд УИХ-ын дарга З.Энхболдыг огцруулах саналыг албан ёсоор гаргах бололтой.