УИХ-ын гишүүн Ж.Батзандан Б.Хурцаас албан ёсоор уучлалт гуйх шүүхийн шийдвэр гарчээ
Баянзүрх дүүргийн Иргэний анхан шатны шүүхэд Тагнуулын ерөнхий газрын дарга асан Б.Хурцын нэхэмжлэлтэй УИХ-ын гишүүн Ж.Батзанданпд холбогдох хэргийг хэлэлцсэн байна.Холбогдох хэргийг хэлэлцэж УИХ-ын гишүүн Ж.Батзанданг буруутай хэмээн үзсэн байна. Өнгөрсөн оны арваннэгдүгээр сард Б.Хурц УИХ-ын гишүүн Ж.Батзанданг гүтгэж, нэр хүндийг нь гутаасан гэх үндэслэлээр шүүхээд өгөөд байсан юм. УИХ-ын гишүүн Ж.Батзандан өнгөрсөн оны арваннэгдүгээр сарын 07-нд мэдээлэл хийхдээ Б.Хурцтай холбоотой хэд, хэдэн гомдол ард иргэдээс ирсэн хэмээн мэдээлэл хийсэн. Үүнд:
Нэгдүгээрт, Д.Энхбат гэдэг залууг С.Зориг агсны хэрэгт холбогдуулан Франц, Германаас унтуулдаг тариа хийж хулгайлж, хууль бусаар авчирсан хүн бол Б.Хурц юм. Үүнийг дэлхий нийтээрээ мэдэж байгаа. Тэр талийгаач залуу бүтэн нэг жил Монголын шоронд хууль бусаар хоригдоод, хилс хэрэгт баривчлагдсан нь тогтоогдож суллагдсанаас хойш 6 сарын дараа амь насаа алдсан
Хоёрдугаарт, Саяхан ТЕГ-ын байцаагчид С.Зориг агсны хэргийг мөрдөн шалгаад Улсын дээд шүүхээр оруулж, улс төрийн захиалгатай аллага байна гэж үзээд, Монгол Улсын гурван иргэнд ял өгч явуулсан. Одоо болтол захиалагч нь олдохгүй байна. Энэ асуудлаар би Хууль зүйн сайд Ц.Нямдоржтой олон удаа уулзсан. ТЕГ-ын дарга энэ хэргийг илрүүлснийхээ төлөө генерал цол авсан байдаг. Бид генералаас асуух ёстой. С.Зоригийг хэргийн захиалагч ил болохоос нааш Б.Хурц гэдэг хүнийг дараагийн ажилд томилох нь утгагүй, хууль зөрчсөн хэрэг гэж би үзэж байна.
Гуравдугаарт, Эрдэнэтийн 49 хувийг Худалдаа Хөгжлийн Банкинд авч өгөх ажиллагааг гардан зохион байгуулсан хүн бол манай алдарт тагнуулч Б.Хурц юм. 49 хувийг Засгийн газар давуу эрхээр худалдан авах бүрэн боломжтой байсан.
Дөрөвдүгээрт, ТЕГ-ын дарга Цогтбаатар гэдэг хүнд хилсээр ял өгч, хэлмэгдүүлж шоронд явуулсан, зохион байгуулсан хүн нь Б.Хурц болох нь үнэн гэдэг өргөдлийг Цогтбаатарын эхнэр Мандах гэдэг эмэгтэй УИХ-д өгсөн. Энэ өргөдлийг УИХ өнөөдрийг хүртэл хэлэлцэхгүй дарж байна. Энэ өргөдлийг шалгаж УИХ дээр ярих ёстой гэж би харж байгаа” хэмээн олон нийтэд мэдээлэл хийж байсан.
Тэгвэл Баянзүрх дүүргийн Иргэний анхан шатны шүүхийн шийдвэрийн дагуу анх мэдээлэл тараасан арга замаараа уучлал гуйх ёстой гэсэн шүүхийн шийдвэр гарсан байна.Тэгэхээр УИХ-ын гишүүн Ж.Батзандан өмнө нь мэдээлэл хийж байсан шигээ уучлалт гуйхаар боллоо.
Тус шүүхийн шийдвэр гарсаны дараа УИХ-ын гишүүн Ж.Батзандан өөрийн цахим хуудаснаа “Б.Хурц Д.Энхбатыг хулгайлсныг, Эрдэнэтийн 49 хувийг ард тvмэнд биш, хувьд авч өгөх ажлыг зохион байгуулсныг манай шүүх л мэдэхгvй байна гэнэ. Б.Хурцын асуудалд Цагаан сарын дараа хариулт өгнөө. Уучлал гуйх тухай ойлголт байхгvй. Миний байр суурь хэвээрээ” хэмээн бичжээ.
