“Пёнчан-2018” өвлийн олимпийн наадамд манай улсаас цанын спортын тамирчин Б.Ачбадрах, Ч.Отгонцэцэг нар оролцсон. Тодруулбал, Гүйлтийн цанын эрэгтэйчүүдийн 15 км-ын уралдаанд Монголын тамирчин Батмөнхийн Ачбадрах 41:40.4 минутын цагийн амжилтаар 97-р байрт орсон. Мөн гүйлтийн цанын эмэгтэйчүүдийн 10 км-ын зайд Чинбатын Отгонцэцэг уралдаж, 90 тамирчнаас 84-р байрт орсон амжилт үзүүлсэн. Өвлийн олимпийн наадамд оролцсон хоёр тамирчныг дагалдан яваа монголын багийнхны тамирчдаа зогсоосон зураг олон нийтэд тарж шүүмжлэлд өртөөд байгаа. Тэгвэл, Монголын багийн ахлагч, УИХ-ын гишүүн Б.Бат-Эрдэнэ уг зургийн талаар тайлбар хийжээ.
Тэрээр “Сошиалаар тарж буй зургийг тэмцээнээс өмнө авсан юм шүү дээ. Сайд нь ирээд бидэнтэй хурал хийх үеэрээ тамирчдынхаа дэглэм, амралтыг нь алдагдуулахгүй гээд түр уриад баяр хүргэж амжилт хүсээд, урамшуулал өгөөд явсан юмсан даа” хэмээн өөрийн хуудсандаа бичсэн байна.