Монгол Улсад ХДХВ-ДОХ-ын анхны тохиолдол 1992 онд бүртгэгдэж, 2017 оны байдлаар ХДХВ/ДОХ-ын 249 тохиолдол бүртгэгдээд байна. “Монгол Улсад халдварын тоо бага мэт харагдаж байгаа ч хүн амын дийлэнх хэсгийг залуучууд эзэлдэг.
ДОХ-ын тархалт өндөр хоёр улсын дунд байрладаг зэрэг нь ихээхэн эрсдэлтэй бүс нутгийн тоонд оруулдаг аж. Монгол Улсад өнөөдрийн байдлаар ДОХ-ын халдвартай 249 иргэн бүртгэгдээд байгаагийн 80 хувийг эрэгтэйчүүд эзэлж байна. Үүний 79,2 хувь нь бэлгийн цөөнх хүмүүс байгаа нь анхаарал татаж байгаа юм.
Насны хувьд 20-44 насныхан буюу 56 хувийг эзэлж байгаа гэсэн судалгаа гарчээ. Харин Монгол Улс ХДХВ/ДОХ-оор нас барагсдын тоогоороо Азийн хүн ам олонтой улс орнуудын жагсаалтад багтжээ. Энэ талаар “Asia News” мэдээлсэн байна.
Тус мэдээлэлд “Дэлхий дахинд ХДХВ/ДОХ-оор нас барагсдын тоо сүүлийн жилүүдэд идэвхитэй буурсаар байгаа ч энэ өвчнөөр нас барагсдын тоо нэмэгдсээр байгаа юм. 2010 онд Азид ХДХВ/ДОХ-ын улмаас нас барсан 240 мянган тохиолдол бүртгэгдэж байсан бол 2016 онд энэ тоо 170 мянга болж цөөрчээ.
НҮБ-ын ХДХВ/ДОХ-ын нэгдсэн хөтөлбөрөөс өнгөрөгч сарын сүүлээр гаргасан судалгааны тайлангаас харахад Ази Номхон далайн бүс нутагт ХДХВ/ДОХ-той 5.1 сая хүн байгаагийн 2.4 сая хүн эмчилгээ хийлгэн, тогтмол эмчийн хяналтад байгаа юм.
Жагсаалтаас харахад хамгийн их хүн амтай Хятад улс ХДХВ/ДОХ-той хүмүүсийн талаарх мэдээллийг тайланд дурьдаагүй байна. Хятад улсад ХДХВ-тэй 430 мянгаас 1.5 сая хүртэлх тооны хүн байж магадгүй гэсэн тооцоог НҮБ-ын мэргэжилтнүүд албан бусаар гаргасан байдаг.
Харин хүн амын тоогоор Азидаа хоёрдугаарт бичигддэг Энэтхэг улс ДОХ-оор нас барагсдынхаа тоогоор жагсаалтын хамгийн эхэнд бичигдэж байна. Энэ нь, 2016 онд тус улсад 62 мянган хүн ДОХ-оор нас баржээ. Мөн Энэтхэг нь ДОХ-оор нас барагсдынхаа тоогоор Өмнөд Афирк болон Нигер улсын ард бичигджээ.
Индонези улс ДОХ-оор нас барагсдын тоогоороо Азид эхнээсээ хоёрдугаарт бичигдэж байна. Тус улсад 2016 онд 38 мянган хүн энэ өвчнөөр нас барсан харамсалтай дүн байдаг.
Тайланд улс 2016 онд ДОХ-оор нас барагсдын тоогоороо Азид гуравдугаарт бичигдсэн бөгөөд ойролцоогоор 16 мянган хүн нас барсан байна.Тус улс нь 2023 он гэхэд ХДХВ-ийн тархалтыг бүрэн зогсоох зорилтыг өнгөрсөн онд дэвшүүлсэн юм.
Вьетнам улсад 2016 онд 8000 орчим хүн амиа алдсан бол Мьянмар болон Малайз улсад 7000-7800 хүн нас баржээ. Түүнчлэн Пакистан улсад 2016 онд 5500 хүн ДОХ-оор нас барсан дүн гарсан бол Камбож 1800, Бангладеш 1700, Непалд 1000 орчим хүн тус өвчнөөр өөд болсон байна.
Монголд 2016 онд ДОХ-оор 100 орчим хүн нас баржээ. Энэ нь сүүлийн арван жилд ХДХВ/ДОХ-ын тал дээр ямар нэг ахицтай өөрчлөлт гараагүйг илтгэж байгаа юм” гэжээ. Хүн амын тоогоор нь харвал манай улсын хувьд энэ тоо тийм ч бага биш юм. Учир нь Азийн 50 орчим улс орноос ХДХВ/ДОХ-ын тоогоор өндөр улс орнуудын жагсаалтад Монгол 14-т бичигдсэн нь цаашид энэ аюулт өвчний эсрэг үр дүнтэй ажлууд хийх шаардлагатайг сануулж буй юм.