Увс аймгийн Цогцолбор 1-р сургуульд мөнгөн ус алдагсан гэх хэргийн талаар өмнө нь бид мэдээлж байсан билээ. Тэгвэл Цогцолбор 1-р сургуулийн Бага сургуулийн хичээлийг ирэх 5 дахь өдөр хүртэл хойшлуулж үргэлжлүүлээд амралт тавих шийдвэр гарчээ.
Тодруулбал Аймгийн засаг дарга Д.Батсайхан, ЗДТГ-ын дарга С.Батжаргал нар өчигдөр Цогцолбор 1-р сургууль дээр явагдаж байгаа ариутгах халдваргүйжүүлэх ажилтай танилцаж, тус сургуулийн удирдлагуудад үүрэг чиглэл өгч ажилласан байна.
Улмаар энэ сарын 9-ны өдрөөс эхлэн тус сургуулийн хичээлийн 2-р байрыг чөлөөлж, нийгмийн эрүүл мэндийн үндэсний төвийн хор судлалын үндэсний лабораторт 86 хүний шээсний шинжилгээг авч хүргүүлжээ.
Мөн МХЕГ-аас шинжээчийг ирүүлж 72 хэсгийн агаараас сорьц авч анги тасалгаануудад байгаа хордолтын хэмжээг тодорхойлохоор ажиллаж байна. Аймгийн ОБГ-аас 39 өрөө тасалгаанд нийт 7 удаа ариутгах халдваргүйжүүлэх, элс асгах, агааржуулалт оруулах, мөн хэрэглэгдэж байсан материалуудыг устгалд оруулах зэрэг ажлыг хийжээ.
Мөн Цагдаагийн газраас хүүхдүүдээс мөнгөн устай холбоотой мэдээ мэдээллийг тодруулах чиглэлээр ажиллаж байна.
Эх сурвалжийн мэдээлснээр хүүхдүүдээс авсан шинжилгээг бямба гаригт буюу энэ сарын 10-ны өдөр явуулах байсан ч онгоц дээж авч явдаггүй гэсэн шалтгаанаар буцааж өчигдөр онгоцоор явуулж цаг алдсан гэнэ. Мөн хэд хэдэн хүүхэд биеэр нь тууралт гарч эмнэлэгт эмчлүүлж байгаа гэсэн мэдээллийг өгсөн юм.
Д.Болор