“Нэг-Цонх” залуучуудын нэгдлээс Швейцарь улсын дээд шүүхээс УИХ-ын гишүүн, Сангийн сайд асан С.Баярцогттой холбоотой хэрэгт ирүүлсэн материалын талаар өнөөдөр мэдээлэл хийв.
"Нэг-цонх" залуучуудын нэгдлийн гишүүн П.Ариунжолоо "Монгол Улсын Засгийн газар Рио Тинтотой байгуулсан хөрөнгө оруулалтын гэрээг ашиггүй гэрээ гэж сүүлийн 10 жилд үзэж байгаа. С.Баярцогт нь буруугүйгээ батлах гэж тайлбар тодруулга хийсэн байгаа. Тэр хүнийг буруутайг нотлох ямар шаардлага байгаа юм бэ.Тиймээс манай клубийн зүгээс С.Баярцогтыг буруугүй гэдгээ нотлох биш алдаагаа засах боломжийг олгох уриалга гаргаж байна" гэв.
Мөн тус нэгдлийн гишүүн П.Амар “2008 оны 5 дугаар сард БНХАУ-ын иргэн А-ын компанийн дансанд 10 сая ам.доллар, мөн 7 дугаар сард 10 сая ам.долларын гүйлгээ орж ирсэн. Энэ мөнгөө төмрийн хүдэр, цайр борлуулж олсон төлбөр хэмээн тайлбарласан байдаг. Энэ цаг үетэй зэрэгцээд Сангийн сайд асан С.Баярцогт “Legend Plus Capital Limited” компани болон өөрийн хувийн дансыг нээсэн. Удалгүй БНХАУ-ын иргэн А-аас С.Баярцогтын компанийн дансанд 8.2 сая евро шилжүүлсэн байдаг. Харин 2013 оны 12 дугаар сар, 2014 оны 1 дүгээр сард С.Баярцогт БНХАУ-ын иргэн А-руу 674.000 евро болон 1.489.000 ам.долларыг шилжүүлж хувийн дансандаа 2.583 ам.доллартай үлдсэн. С.Баярцогт нь тухайн үед Монгол Улсын Сангийн сайд байх хугацаандаа Рио Тинто компанитай урт хугацааны хөрөнгө оруулалтын гэрээ байгуулсан. Энэ нь түүнийг сэжиглэх шалтгаан болоод байна. Мөн Монгол Улс Рио Тинтотой хийсэн гэрээ нь харилцан ашиггүй байх үндэслэлтэй гэж Швейцарь улсын дээд шүүхээс үзсэн. Тиймээс бидний зүгээс С.Баярцогтыг уучлал гуйж, алдаагаа засахыг хүсэж байгаа юм” гэлээ.