ДУУЛИАН
Өчигдөр Монголын үндэсний бөхийн холбоонд болсон үйл явдал олон нийтийн анхаарлын төвд байсаар байна. Болсон үйл явдлыг товч хүргэвэл, Монголын Үндэсний бөхийн холбооноос маргааш “Их Эе” их хурлыг зохион байгуулах гэж байна. Гэтэл гурван шатны шүүхээс уг хурлыг хуралдуулж болохгүй гэх шийдвэр гарсныг өчигдөр Шийдвэр гүйцэтгэх албаныхан МҮБХ-ны тэргүүн Р.Нямдоржид гардуулахыг хүссэн ч даралт ихэссэн гэх шалтгаанаар гардан авахаас татгалзсан юм. Харин МҮБХ-ны дэд тэргүүн Д.Данзан болон Р.Нямдоржийн хүү улсын гарьд Н.Ганбаатар нар шүүхийн шийдвэр гүйцэтгэх албаны албан хаагчдыг Бөхийн өргөө рүү нэвтрэхийг эсэргүүцсэний улмаас үл ойлголцол үүсч зодоон цохиондоо туллаа.Шүүхийн гүйцэтгэх газрын албан хаагчид цагдаагийн нэмэлт хүч гарган Бөхийн өргөөний урд талын хаалгыг эвдэн дотогш нэвтэрсэн. Бөхийн холбооны зүгээс шүүхийн шийдвэрийг даваа гаригт өөрсдийн биеэр очин гардаж авъя гэх тайлбарыг өгсөн боловч шүүхийн шийдвэр гүйцэтгэх албанаас заавал өнөөдөр Р.Нямдоржид өөрт нь гардуулж өгнө гэж зүтгэж байв. Хоёр тал нэлээдгүй хугацаанд талцаж, маргалдсаны эцэст бөхийн холбооны саналыг хүлээж аван даваа гаригт өөрсдийг нь очиж авахыг хүлээхээр болсноор асуудал түр намжаад байна.
БӨХИЙН ХОЛБООГ ӨӨРИЙН БОЛГОХ ГЭСЭН ЗОДООН
Одоогийн бөхийн холбооны тэргүүн Р.Нямдорж нь өөрийн дүү улсын заан Р.Даваанямын хамтаар бөхийн өргөөг байгуулах санаачлага гарган ард түмнээс хандив аван 1991 онд тус өргөөг босгосон байдаг. Улсын төсвөөр бус ард түмний хандиваар босгосон гэсэн үг. Ингээд Монгол бөхийн дүрэм, журмыг зохион батлуулж үйл ажиллагааг нь тасралтгүй хөгжүүлсээр иржээ. Р.Нямдорж гуайн хувьд уг холбоог 28 жил тасралтгүй удирдаж буй. Үүнийг нь Хөдөлмөрийн баатар, дархан аварга Х.Баянмөнх, УИХ-ын гишүүн, дархан аварга А.Сүхбат нарын хүмүүс эрс эсэргүүцдэг билээ. Тэд бөхийн холбоог ганц хүн он удаан жил удирдаж байна уг байгууллагын үйл ажиллагаанд салхи оруулах шаардлагатай хэмээн шүүмжилсээр олон жилийг үджээ.
Энэ л үйл ажиллагааны үр уршиг өчигдөр гарсан нь энэ юм. Өчигдөр гардуулан өгөх гэж байсан шүүхийн шийдвэрт “Их Эе”-ийг хуралдуулж болохгүй, тус холбооны тэргүүн Р.Нямдоржийг тамга, тэмдэг ашиглахыг хориглосон гэж заасан байна.
Иргэд олон нийт Х.Баянмөнх тэргүүтэй хүмүүс бусдын байгуулсан Бөхийн холбоог хүчээр авахаар элдэв арга санаачилж байна хэмээн ярьж байна.
МҮБХ-ны тэргүүн Р.Нямдорж ТВ5 телевизийн “Монгол улсаа хөгжүүлье” нэвтрүүлэгт оролцон 2017 оны тавдугаар сард болсон ээлжит “Их Эе” хурлыг хууль бус хуралдсан хэмээн үзэн мэдэгдсэн билээ. Х.Баянмөнх, Ж.Ганболд, А.Сүхбат, Ц.Дуламсүрэн нарын зохион байгуулж хуралдуулсан ээлжит бус “Их Эе” гэх цуглаан нь МҮБХ-ны дүрэм, “Ээлжит ба ээлжит бус Их Эеийн төлөөлөгчдийн бүрэлдэхүүнийг тогтоох журам”, УДШ-ийн 2003 оны 403-р тогтоолыг ноцтой зөрчсөн хэмээн мэдэгдэж, баримтыг дэлгэсэн юм. Энэхүү хурлаар холбооны тэргүүнээр Л.Чинбатыг томилоод байсан юм. “Гачуурт”-ын Л.Чинбатыг Монголын чөлөөт бөхийг холбоог элгээр нь хэвтүүлсэн, өнөөгийн хуваагдлын эхлэлийн тавьсан гэж МҮБХ-ны дэд тэргүүн Д.Данзан түүнд хандсан захидалдаа дурдсан. Монголын үндэсний бөхийн холбооноос “Их Эе” ээлжит их хурлыг ирэх бямба гаригт хуралдуулна гэдгээ албан ёсоор мэдэгдсэн. Одоогоор Бөхийн өргөөнд төлөөлөгчдийн бүртгэл, мандат олгох үйл ажиллагаа явагдаж байгаа бөгөөд энэ сарын 25-ны өдрийг хүртэл ямар нэгэн арга хэмжээ болохгүй юм байна.Ийнхүү “Их Эе”-ийн сургаар үндэсний бөхчүүд хөдөлгөөнд орж, Бөхийн өргөөг булаацалдсан зодоон нь идэвхжиж эхэлсэн нь энэ.
Хэрвээ энэ хурлаас Р.Нямдоржийг бөхийн холбооны тэргүүнээр хэвээр үлдээвэл дараагийн асуудал хэрхэн хөврөх нь тодорхой болох юм.
Сэтгүүлч Ч.Доржбатын шууд бичлэгийг хүргэе.