УИХ-ын Хууль зүйн байнгын хорооны хуралдаж Д.Гантулга гишүүнтэй холбоотой Халдашгүй байдлын дэд хорооны хурлын тайланг сонслоо.
Тайланг Хууль зүй, дотоод хэргийн сайд Ц.Нямдорж танилцуулаад “Халдашгүй байдлын дэд хороо таван гишүүнтэй. Энэ удаагийн хуралдаанд Н.Энхболд гишүүнээс бусад нь суусан. УИХ-ын тухай хуулийн 6.9.1 дүгээр заалтыг Үндсэн хуулийн Их суудлын хуралдаанаар хүчингүй болгосон байтал хууль дотор баахан 6.9.1 дүгээр заалтыг дурдсан байна. Ийм байдлаас болоод хуульд яаралтай өөрчлөлт оруулах шаардлага гарч байна. Түүнээс гадна Ерөнхий прокурор ч гишүүний бүрэн эрхийг түдгэлзүүлэх эрх зүйн боломжгүй болж хувчирчээ. Энд нэг зүйлийг сануулахад Д.Гантулгыг хамгаалаад байгаа юм байхгүй. Хуулиа ойлгомжтой болгохгүй бол УИХ өөрөө хууль зөрчих нөхцөл байдал үүснэ. Тиймээс хуулийн ойлгомжгүй байдлыг яаралтай засахгүй бол дахиад нэг гишүүнийг яллагдагчаар татсан асуудал орж ирж мэдэх юм” гэв.
Үндсэн хуулийн цэцийн их суудлын хуралдаанаар гаргасан тогтоолыг хэд хоногийн дотор хүлээж авах ёстой гэсэн заалт байхгүй ч хуулийн мухардлыг арилгах боломж байгаа гэдгийг УИХ-ын Тамгын газраас хэлж байна.
Хууль зүйн байнгын хорооны хуралдаанаар УИХ-ын гишүүн, Төрийн байгуулалтын байнгын хорооны дарга Д.Лүндээжанцан хуулийн мухардлыг арилгахаар ажиллаж байгаа тул тэр болтол Д.Гантулгын өргөдлийг хэлэлцэх боломжгүй гэдэгт санал нэгдсэн юм.
