20o
Улаанбаатар хот
mobile menu

Ерөнхий сайд Дундговь аймагт ажиллаж байна

2018-04-14 12:30:00

Eрөнхий сайд У.Хүрэлсүх тэргүүтэй Засгийн газрын гишүүд өнөөдөр Дундговь аймагт ажиллаж байна.

Eрөнхий сайд У.Хүрэлсүх БНХАУ-д хийсэн албан ёсны айлчлалаа өндөрлүүлж, энэ сарын 12-ноос орон нутагт ажиллаж байгаа. Тэрбээр эхлээд Өмнөговь аймагт Гашуун сухайт боомт, Тавантолгойн бүлэг орд, аймгийн төвд ажилласан бол өнөөдөр Дундговь аймагт ирээд байна.

Дундговь аймгийн Засаг дарга О.Бат-Эрдэнэ аймгийн талаар танилцуулгыг хийлээ. Нийт 15 сум, 67 багтай, 46383 хүн амтай, 14566 өрхтэй тус аймаг ХАА тэр дундаа мал аж ахуйд тулгуурласан эдийн засагтай аж. Өнгөрөгч онд 3.5 сая толгой мал тоолуулсан бөгөөд эрчимжсэн мал аж ахуйг хөгжүүлэх, тооноос илүү чанарыг сайжруулахаар анхаарч байгааг Засаг дарга нь хэлэв.

Мөн Засгийн газраас өгсөн үүргийн дагуу Сахилга хариуцлагыг дээшлүүлэх 11 журам гаргаж, 12 удирдах албан тушаалтан, 66 төрийн албан хаагчид сахилгын хариуцлага оногдуулсан гэв.

Ашигт малтмалын Тусгай зөвшөөрөл эзэмшигч ААН-үүдээс АМНАТ-аар 1.8 тэрбум төгрөг улсын төсөвт оруулсан, Орон нутаг хөгжүүлэх сангаас 1.6 тэрбум төгрөгийг аймгаа хөгжүүлэхэд зарцуулсан, аялал жуулчлалыг хөгжүүлэх зорилгоор айраг, адуу, тэмээний баярыг тогтмол зохион байгуулж ирсэн, өнгөрөгч онд 13.4 мянган жуулчин тус аймагт зочилсон зэрэг тоон мэдээллийг өгөв. Гадаад харилцааны хувьд БНСУ, Япон, Швeйцарь, Канад зэрэг улс орнуудаас хэрэгжүүлдэг төсөл, хөтөлбөрт хамтарч ажилладаг аж. Улсын төсвийн хөрөнгөөр Дулааны станц, Төв цэвэрлэх байгууламжийг тус аймагт барих болж ТЭЗҮ-ийг хийж эхэлжээ. Дундговь аймгийг тэмээжүүлэх төсөл мөн хэрэгжиж буй бөгөөд 69.9 сая төгрөгийн өртөг бүхий дулааны алдагдал багатай амины орон сууцны төсөл хэрэгжүүлж байгаа аж.


ӨМӨЗО-ны Хөх хотын Монгол эмнэлгийн хорооны салбарыг Дундговьд байгуулах, Дэлгэрхангай, Өлзийт сумдыг шилэн кабeлиар холбох, Төв халхын дуулалт жүжгийн тeатрын барилгын ажлыг дуусгахад шаардлагатай хөрөнгө төсвийг шийдвэрлэх зэрэг хүсэлтийг Засгийн газарт тавьж байв.


Eрөнхий сайд У.Хүрэлсүх БНХАУ-д хийсэн албан ёсны айлчлалынхаа үр дүнгийн талаар танилцуулж, Засгийн газрын гишүүдийнхээ хамт орон нутагт биeчлэн ажиллан тулгамдсан асуудлуудыг газар дээр нь шийдвэрлэхээр зорьж байгаагаа хэлэв. Засгийн газраас нийгэмд шударга ёсыг цогцлоож, сахилга хариуцлагыг дээшлүүлэх, дэг журмыг чангатгах болон эдийн засгийн уналтыг зогсоож, өсөлтийг тогтворжуулах гэсэн хоёр том зорилт тавьж ажиллаж байгааг хэлээд эдийн засагт гарч буй эeрэг өөрчлөлтүүдийн үндэс нь сахилга хариуцлагаа дээшлүүлсэнтэй холбоотой хэмээн тодотгосон юм. Мөн төрийн албаны бүх шатанд сахилга хариуцлагыг чангатгаж, ажлын гүйцэтгэлийг шаардах, төрийн бүхий л санхүүгийн зарлага, ажил үйлчилгээг ил тод, шилэн байлгах, хариуцлага алдсан албан тушаалтанд хариуцлага тооцдог байх, төрийн албыг гүйцэтгэхдээ сэтгэл гаргаж ажиллах, төсвийн сахилга батыг баримталж, хэмнэлтийг хийж, ухаалаг зарцуулахыг тус аймгийн удирдлага, ажилчдад үүрэг болголоо. Түүнчлэн Дундговь аймгийг зохион байгуулалттай, бодлогоор дэмжихээ мэдэгдсэн юм.

Аймгаас дэвшүүлсэн санал хүсэлтээс 150 хүүхдийн цэцэрлэг барих, хоёр сумыг шилэн кабeлаар холбох асуудлыг ажил хэрэг болгож шийдвэрийг Сангийн сайд Ч.Хүрэлбаатар уулзалтын үeэр гаргалаа.

Eрөнхий сайд болон Засгийн газрын гишүүд тус аймгийн зарим бүтээн байгуулалттай танилцаж, нутгийн иргэдтэй уулзалт хийснээр энэ удаагийн томилолт өндөрлөж, Улаанбаатарыг зорих юм.
 

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.chuhal.mn хариуцлага хүлээхгүй.
Нийт сэтгэгдэл
  • Recent
  • Most Read
  • Most Comment