Алтжин" группийн захирал Г.Алтангийн хүү Эдуард Сүрэнгийн нэхэмжлэхтэй Төрийн банкинд холбогдох шүүх хурал өчигдөр Баянзүрх дүүргийн шүүхэд болж шүүх бүрэлдэхүүн шийдвэрээ гаргасан байна. Шүүгчид Эдуард Сүрэнгийн Ш.Батхүүд зээлүүлсэн 51 тэрбум 596 сая төгрөгийг Төрийн банк төлөх шийдвэрийг гаргажээ.
2010 онд “Алтжин” компанийн захирал Г.Алтангийн хүү Эдуард Сүрэнгээс Ш.Батхүү 32,8 сая ам.долларын зээл авахдаа одоогийн Төрийн банк буюу тухайн үеийн Хадгаламж банкийг батлан даагч болгох гэрээ хийсэн байдаг. Харин “Жаст” групп дампуурч, Хадгаламж банкийг төрд шилжүүлснээс 3 сарын дараа Э.Сүрэн Ш.Батхүүд зээлүүлсэн гэх 32,8 сая ам.доллар буюу 51 тэрбум 596 сая төгрөгөө Төрийн банкнаас нэхэмжилсэнээр энэ хэрэг эхлэлтэй.
Гэтэл Төрийн банкны удирдлагуудын зүгээс тухайн үед Хадгаламж банк зээлд баталгаа гаргах эрхгүй байсан учир зээлийн гэрээг хуурамчаар бүрдүүлсэн байх үндэслэлтэй талаар мэдээлж байсан удаатай. Тиймээс уг шүүх хуралд "Жаст"-ын Ш.Батхүү өөрийн биеэр оролцож гэрчийн мэдүүлэг өгч зээлийн гэрээ үнэн эсэхийг тодруулсан гэдгийг эх сурвалж мэдэгдсэн юм.
Мөн Ш.Батхүүг ШШГЕГ-ын харьяа Цагдан хорих 461 дүгээр ангид саатуулагдсан цагаас хойш биеийн байдал нь муудаж, чихрийн шижин өвчин нь хүндэрч хоол идэж чадахгүй байгаа аж.
Д.Болор