УИХ-ын чуулганы хуралдааны үеэр УИХ-ын гишүүн Ж.Энхбаяр эдлэг шонхор шувууг хууль бусаар их хэмжээгээр нь хил давуулж буй талаар ярьсан. Тодруулбал, УИХ-ын гишүүн Д.Оюунхоролыг Байгал, орчин аялал жуулчлалын сайд байхад нийт 700 гаруй шонхорыг гаргасан гэж буй.
Энэ талаар УИХ-ын гишүүн БОАЖ-ын сайд асан Д.Оюунхоролоос тодрууллаа.
- Таныг БОАЖ-ын сайдаар ажиллаж байхад нийт 700 гаруй шонхор шувууг нэг жилийн дотор хил давуулсан гэлээ. Энэ талаар та тайлбар өгнө үү?
- Нэг жилд 260 орчим шувууг гаргах зөвшөөрлийг олгодог байсан. Одоо ч ийм л хэмжээнд олгодог. Н.Энхбаяр гишүүнийг үндэслэлгүй, сэтгэлийн хөдлөлөөрөө, попорсон улс төрийн мэдэгдлүүдийг хийдэг гэж хардаг. Заримдаа баримжаа, баримтгүй ярьдаг. Өөрөө од болох гээд бусдыг гүтгэх тэр дундаа төрийн албан хаагчид руу дайрах, илэрхий дээрэлхэх нь дэмий юм. Тиймээс аливаа зүйлийг ярихдаа бүхий л мэдээллийг нь аваад цаасан дээрх тоог нягталчихаад ярих хэрэгтэй. Засгийн газрын хуралдаанаар ямар шийдвэрүүд гарч байсныг нь харах хэрэгтэй юм.
- Нэг дор 700 шувуу гаргах боломжтой юу?
- Ямар ч боломжгүй. Гарч ч байгаагүй. Аль ч сайдын үед ингэж олноороо гарч байгаагүй. Би ажил хариуцаж байсан сайдын хувьд онц хариуцлагатайгаар хэлье. Жилд 250-300 орчим шувуу л гаргах зөвшөөрөл олгодог. Одоо ч тийм л байгаа. Ж.Энхбаярын хэлсэнчлэн жилд 700 гаруй шувууг гаргадаг түүнийг нь хууль ,хяналтын байгууллага нь нүдээ аниад өнгөрөөдөг байсан зүйл байхгүй. Тэгэж худлаа ярьж болохгүй. Улс төрчдийн хариуцлагагүй мэдэгдлүүд нийгмийг талцуулж байна. Сошиал медиа хэрэглэгчид улс төрчдийн хэлсэн үгний үнэн, зөвийг мэдэхгүй шүү дээ. Ийм хариуцлагагүй зүйл ярьж болохгүй.
Т.Хулан
