Сар шинийн баярын дараа уламжлал ёсоор хурдан морины уралдаанууд ар араасаа болж эхэлдэг ба дийлэнх нь Төв аймагт зохиогддог юм.Харин өвлийн цагт хүүхдээр морь унуулах нь хүүхдийн эрхэнд халдаж байгаа хэлбэр бөгөөд ард иргэд болон хүний эрхийн байгууллагын зүгээс шүүмжлэл, эсэргүүцэлтэй байнга тулгардаг. Тэгвэл өнгөрсөн долоо хоногт буюу нэгдүгээр сарын 29-ний өдөр Төв аймгийн Засаг дарга Д.Баярбат тус аймгийн нутаг дэвсгэрт морин уралдаан зохион байгуулахыг хориглосон захирамж гаргажээ.
Тэрээр, ирэх тавдугаар сарын нэгэн хүртэл буюу өвөл, хаврын саруудад Төв аймгийн нутаг дэвсгэрт ямар нэг морин уралдаан зохион байгуулахыг хориглож, томоохон хэмжээний сунгаа, үсэргээ хийхгүй байхыг сумдын засаг дарга нарт үүрэг болгосон байна.
